एकाच वेळी खुनाचा गुन्हा तासात उघड, गावठी कट्ट्यासह सराईत गजाआड, घरफोडीची मालिका बेनकाब आणि टवाळखोरांवर धडक कारवाई; नाशिकरोड परिसरात पोलिसांचा अभूतपूर्व दरारा!
लाल 🚨 दिवा-नाशिकरोड, दि. ०४: नाशिक शहरात कायदा आणि सुव्यवस्थेचा धाक निर्माण करण्यासाठी पोलीस आयुक्त श्री. संदीप कर्णिक यांनी दिलेल्या आदेशानंतर गुन्हेगारी विश्वाचे कंबरडे मोडणारी एक महाकाय कारवाई नाशिकरोड आणि उपनगर परिसरात राबविण्यात आली आहे. एखाद्या थरारपटालाही लाजवेल अशा या ‘ऑपरेशन ऑलआऊट’मध्ये पोलिसांनी एकाच वेळी खुनाच्या गुन्ह्यातील आरोपींना तासाभरात बेड्या ठोकल्या, गावठी कट्ट्यासह हद्दपार गुन्हेगाराला जेरबंद केले, अट्टल घरफोड्याच्या मुसक्या आवळल्या आणि तब्बल २२४ टवाळखोरांवर कारवाईचा बडगा उगारला. या चौफेर हल्ल्यामुळे गुन्हेगारी विश्वात प्रचंड खळबळ उडाली असून, नागरिकांनी सुटकेचा निःश्वास सोडला आहे.
विशेष मोहीम: टवाळखोरीचा बाजार उठवला!
मा. पोलीस आयुक्त श्री. संदीप कर्णिक यांच्या सूचनेनुसार, गुन्हे शाखेने नाशिकरोड व उपनगर परिसरात टवाळखोरांविरोधात अचानक विशेष ‘कोंबिंग ऑपरेशन’ राबवले. दिनांक ०३ ऑक्टोबर रोजी सायंकाळी साडेसहा ते रात्री अकरा वाजेपर्यंत चाललेल्या या धडक मोहिमेत गुन्हे शाखेच्या तब्बल १२ विविध पथकांनी भाग घेतला. रस्त्यावर, मोकळ्या मैदानांत दारू पिणारे, ट्रीपल सीट फिरणारे, विनाकारण घोळक्याने उभे राहून दहशत निर्माण करणाऱ्या एकूण २२४ टवाळखोरांना पोलिसांनी ताब्यात घेतले. त्यापैकी सार्वजनिक ठिकाणी मद्यपान करणाऱ्या २२ जणांवर दारूबंदी कायद्यान्वये गुन्हे दाखल करण्यात आले, तर उर्वरित २०२ जणांवर महाराष्ट्र पोलीस कायद्यान्वये कडक कारवाई करण्यात आली. या कारवाईने शहरातील गुंडगिरी आणि टवाळखोरीला मोठा चाप बसला आहे.
थरार पहिला: रक्ताचा बदला! अवघ्या तासाभरात खुनी गजाआड!
एकीकडे ही मोहीम सुरू असतानाच, दिनांक ०२ ऑक्टोबर रोजी रात्री सव्वाअकराच्या सुमारास जाधववाडीत क्षुल्लक भांडणातून कृष्णा ठाकरे या तरुणावर धारदार शस्त्रांनी हल्ला करून त्याची निर्घृण हत्या करण्यात आली होती. घटनेचे गांभीर्य ओळखून वरिष्ठ पोलीस निरीक्षक जितेंद्र सपकाळे आणि गुन्हे शोध पथकाने चित्त्याच्या चपळाईने तपासचक्रे फिरवली. गुन्हा घडल्यापासून अवघ्या एका तासाच्या आत, गुन्हा दाखल होण्यापूर्वीच पोलिसांनी मुख्य आरोपी मोईन शेख, प्रकाश बारसे आणि दोन अल्पवयीन साथीदारांना वेगवेगळ्या ठिकाणांहून शोधून काढून जेरबंद केले. पोलिसांच्या या अविश्वसनीय कामगिरीने परिसरात कायदा सुव्यवस्थेवर नियंत्रण मिळविण्यात मोठे यश आले.
थरार दुसरा: ‘कट्टा’ विक्रीचा डाव उधळला! हद्दपार गुन्हेगार जेरबंद!
नाशिकरोड रेल्वेस्टेशनजवळील एका पडक्या इमारतीत दोन सराईत गुन्हेगार गावठी कट्टा विकण्यासाठी येणार असल्याची गुप्त माहिती मिळताच, गुन्हे शोध पथकाने साध्या वेशात सापळा रचला. पोलिसांच्या रेकॉर्डवरील गुन्हेगार सनी श्रीवंत आणि हद्दपार आरोपी ऋषिकेश तुंगार येताच पोलिसांनी त्यांच्यावर झडप घातली. त्यांच्याकडून ३१,००० रुपये किमतीचे गावठी पिस्तूल (कट्टा), मॅगझीन आणि जिवंत काडतूस जप्त करून दोघांच्याही मुसक्या आवळण्यात आल्या.
थरार तिसरा: रात्रीच्या गस्तीत ‘अट्टल’ घरफोड्या सापडला!
वरिष्ठांच्या आदेशाने सुरू असलेल्या कडक रात्र गस्तीदरम्यान, पोलिसांना सिन्नर फाटा परिसरात अट्टल घरफोड्या सागर गरड संशयितरित्या फिरताना आढळला. त्याला ताब्यात घेऊन पोलिसी खाक्या दाखवताच त्याने चेहडी आणि पळसे परिसरात केलेल्या दोन घरफोड्यांची कबुली दिली. त्याच्याकडून पोलिसांनी एकूण २,४३,००० रुपयांचा मुद्देमाल जप्त करून दोन्ही गुन्हे उघडकीस आणले.
पोलीस आयुक्त श्री. संदीप कर्णिक, पोलीस उपायुक्त (गुन्हे) श्री. किरणकुमार चव्हाण, पोलीस उपायुक्त (परिमंडळ-२) श्री. किशोर काळे आणि सहायक पोलीस आयुक्त श्री. संदिप मिटके व डॉ. सचिन बारी यांच्या मार्गदर्शनाखाली नाशिकरोड व उपनगर पोलीस आणि गुन्हे शाखेच्या विविध पथकांनी ही नेत्रदीपक कामगिरी केली आहे. या अभूतपूर्व कारवाईमुळे गुन्हेगारांना कठोर संदेश मिळाला असून, पोलिसांच्या कामगिरीचे सर्व स्तरांतून कौतुक होत आहे.
