रात्री साडेनऊची थरारक घटना; प्रशासनाची उडाली धांदल, BPCL पथकासह अग्निशमन दलाच्या गाड्या घटनास्थळी दाखल, वाहतूक पूर्णपणे ठप्प!
लाल 🚨 दिवा-चांदवड, दि.९:- सप्टेंबर:नाशिक-धुळे महामार्गावरील चांदवड तालुक्यातील धोकादायक राहूड घाटात काल रात्री साडेनऊच्या सुमारास एक महाभयंकर अपघात घडला. भारत पेट्रोलियम कॉर्पोरेशन लिमिटेड (BPCL) कंपनीचा एलपीजी गॅसने भरलेला टँकर पलटी झाल्याने संपूर्ण परिसरात एकच खळबळ उडाली आहे. टँकरमधून मोठ्या प्रमाणात गॅस गळती होत असल्याने, हा परिसर जणू एका ‘जिवंत बॉम्ब’वर बसल्याची स्थिती निर्माण झाली असून, प्रशासनाने तात्काळ महामार्गावरील वाहतूक दोन्ही बाजूंनी पूर्णपणे थांबवली आहे.
मिळालेल्या माहितीनुसार, हा अपघात सोमवारी (दि.८) रात्री अंदाजे ९:३० वाजता घडला. घाटातील एका वळणावर चालकाचे नियंत्रण सुटल्याने हा एलपीजीने भरलेला टँकर रस्त्याच्या कडेला पलटी झाला. अपघाताची माहिती मिळताच चांदवड पोलीस स्टेशनचे पोलीस निरीक्षक श्री. वाघ आणि त्यांचे पथक तातडीने घटनास्थळी दाखल झाले. अपघातानंतर टँकरमधून मोठ्या प्रमाणात गॅस गळती सुरू झाल्याने परिसरात तीव्र वास पसरला आणि नागरिकांमध्ये भीतीचे वातावरण निर्माण झाले.
परिस्थितीचे गांभीर्य ओळखून तहसीलदार श्री. कुलकर्णी यांनी घटनास्थळी धाव घेतली. BPCL कंपनीचे तांत्रिक पथक (श्री. यादव यांच्या नेतृत्वाखाली) देखील तातडीने दाखल झाले असून गळती थांबवण्यासाठी शर्थीचे प्रयत्न सुरू आहेत. खबरदारीचा उपाय म्हणून आणि कोणतीही अनुचित घटना टाळण्यासाठी मालेगाव महानगरपालिका, मनमाड नगरपरिषद, नांदगाव नगरपरिषद आणि महाराष्ट्र नॅचरल गॅस लिमिटेड (MNGL) यांच्या अग्निशमन दलाच्या गाड्यांना पाचारण करण्यात आले आहे.
या भीषण अपघातामुळे मुंबई-आग्रा महामार्गावरील वाहतूक पूर्णपणे ठप्प झाली आहे. पोलिसांनी दोन्ही बाजूंची वाहतूक दुसऱ्या मार्गांवरून वळवली आहे, ज्यामुळे वाहनांच्या लांबच लांब रांगा लागल्या आहेत. सुदैवाने, या घटनेत अद्याप कोणत्याही जीवितहानीचे वृत्त नाही, मात्र प्रशासन कोणतीही जोखीम पत्करण्यास तयार नाही. संपूर्ण परिसर रिकामा करण्यात आला असून, नागरिकांना घटनास्थळापासून दूर राहण्याचे आवाहन करण्यात आले आहे.
रात्री उशिरापर्यंत गॅस गळती रोखण्याचे आणि टँकरला सुरक्षितपणे हटवण्याचे काम युद्धपातळीवर सुरू होते. संपूर्ण प्रशासन आणि आपत्कालीन यंत्रणा परिस्थितीवर बारकाईने लक्ष ठेवून असून, पुढील काही तास अत्यंत महत्त्वाचे ठरणार आहेत.
