गुप्त खबऱ्याच्या माहितीवरून गुन्हे शोध पथकाने रचला सापळा; ५१ हजारांचा मुद्देमाल जप्त, नागरिकांकडून कौतुक
लाल 🚨 दिवा-नाशिक, दि. १९:पंचवटी परिसरात नुकत्याच घडलेल्या एका धाडसी घरफोडीच्या गुन्ह्याने खळबळ उडाली होती. मात्र, पंचवटी पोलीस ठाण्याच्या गुन्हे शोध पथकाने आपल्या अतुलनीय कार्यक्षमतेचे प्रदर्शन करत, गुन्हा घडल्यापासून अवघ्या २४ तासांच्या आत तीन आरोपींना बेड्या ठोकल्या आहेत. या तुफानी कारवाईत पोलिसांनी चोरलेला संपूर्ण मुद्देमाल हस्तगत केला असून, या कामगिरीमुळे नागरिकांमध्ये सुरक्षिततेची भावना निर्माण झाली आहे व पोलिसांच्या कामगिरीचे सर्वत्र कौतुक होत आहे.
याप्रकरणी पंचवटी पोलीस ठाण्यात गुन्हा र. नं. ३५६/२०२५ नुसार भारतीय न्याय संहिता कलम ३०५(१), ३३१(३) व ३३१(४) अन्वये गुन्हा दाखल करण्यात आला होता. घटनेचे गांभीर्य ओळखून पोलीस आयुक्त श्री. संदीप कर्णिक, पोलीस उपआयुक्त श्रीमती. मोनिका राऊत आणि सहायक पोलीस आयुक्त श्रीमती संगिता निकम यांनी तात्काळ तपासाची चक्रे फिरवली. वरिष्ठ पोलीस निरीक्षक श्री. गजेंद्र पाटील यांना गुन्हेगारांना लवकरात लवकर जेरबंद करण्याच्या सक्त सूचना देण्यात आल्या.
वरीष्ठांच्या मार्गदर्शनाखाली गुन्हे शोध पथक कामाला लागले असतानाच, पथकातील पोलीस शिपाई कुणाल पचलोरे यांना त्यांच्या विश्वासू गुप्त बातमीदारामार्फत आरोपींविषयी पक्की खबर मिळाली. क्षणाचाही विलंब न लावता, गुन्हे शोध पथकाने अत्यंत नियोजनबद्ध सापळा रचून तीन संशयितांना ताब्यात घेतले.
पोलिसी खाक्या दाखवताच आरोपींनी आपला गुन्हा कबूल केला. मयुर राजाराम जाधव (वय ३०), जितेश उर्फ गुड्डू चिंतामण फसाळे (वय २१) आणि संदीप छोटुलाल कनोजिया (वय २५) अशी या त्रिकुटाची नावे आहेत. त्यांच्याकडून गुन्ह्यात चोरलेला ५१,००० रुपये किमतीचा मुद्देमाल, ज्यात आयुर्वेदिक औषधांच्या बाटल्यांवरील विशिष्ट लोगो असलेले ॲल्युमिनियमचे झाकण (कॅप) होते, तो जप्त करण्यात आला. या गुन्ह्याचा पुढील तपास पोलीस हवालदार महेश नांदुर्डीकर करत आहेत.
- कौतुकास्पद कामगिरी करणारी टीम
पंचवटी पोलिसांच्या या वेगवान आणि कौतुकास्पद कामगिरीमुळे गुन्हेगारी वर्तुळात चांगलीच दहशत निर्माण झाली आहे. ही उल्लेखनीय कामगिरी पोलीस आयुक्त श्री. संदीप कर्णिक, पोलीस उपआयुक्त श्रीमती. मोनिका राऊत, सहायक पोलीस आयुक्त श्रीमती संगिता निकम आणि वरिष्ठ पोलीस निरीक्षक श्री. गजेंद्र पाटील यांच्या मोलाच्या मार्गदर्शनाखाली पार पडली.
गुन्हे प्रकटीकरण शाखेचे अधिकारी सपोनि. सतिश शिरसाठ यांच्या नेतृत्वाखाली सपोउनि. संपत जाधव, पोहवा. शिंदे, पोहवा. महेश नांदुर्डीकर, पोहवा. काळे, पोना. लोणारे, पोशि. गायकवाड, पोशि. कुणाल पचलोरे, पोशि. अंकुश काळे, पोअं. परदेशी, पोअं. बहिकर, पोशि. वायंकडे, पोशि. चितळकर, पोशि. पवार आणि मपोशि. शिंदे यांच्या पथकाने ही कारवाई यशस्वीरित्या पार पाडली.
