नाशिकमध्ये बेकायदा शस्त्रास्त्रांचा धोका वाढतोय! एकाच दिवशी तीन घटना उघडकीस, शहर सुन्न
लाल 🚨 दिवा नाशिक,दि.८: – नाशिक शहराला सध्या बेकायदा शस्त्रास्त्रांच्या धोक्याने घेरले आहे. गेल्या २४ तासांत घडलेल्या तीन धक्कादायक घटनांनी शहराची झोप उडवली असून नागरिकांमध्ये भीतीचे वातावरण पसरले आहे. पोलीस प्रशासनापुढे हे एक मोठे आव्हान उभे राहिले आहे.
पहिली घटना: ६ ऑगस्टच्या रात्री पावणे अकराच्या सुमारास पवननगर परिसरात गस्त घालणाऱ्या पोलिसांना एक संशयास्पद तरुण दिसला. राहुल डोंबे नावाच्या या तरुणाला ताब्यात घेऊन झडती घेतली असता, त्याच्याकडून देशी बनावटीची पिस्तूल आणि एक जिवंत काडतूस सापडले. चौकशी दरम्यान, डोंबे याने हे शस्त्र सागर सोनार नावाच्या एका व्यक्तीकडून घेतल्याची कबुली दिली. सोनार हा सध्या फरार असून त्याचा शोध सुरू आहे. डोंबे हा कुठल्या गँगचा सदस्य आहे का, याचा तपास सुरू आहे. त्याच्यावर आधीपासूनच गुन्हे दाखल आहेत का, याचीही चौकशी केली जात आहे.
दुसरी घटना: दुसऱ्याच दिवशी पहाटे साडे दोन वाजता पोलिसांना गुप्त माहिती मिळाली की, हॉटेल लक्स रिव्हेरामध्ये एका व्यक्तीकडे बेकायदा शस्त्रास्त्रे आहेत. पोलिसांनी तात्काळ छापा टाकून प्रिन्स सिंग नावाच्या व्यक्तीला अटक केली. त्याच्या ताब्यातून दोन पिस्तुला आणि एक काडतूस जप्त करण्यात आले. सिंग हा कुठल्या टोळीसाठी काम करतो का, याचा तपास सुरू आहे. त्याचे इतर शहरांशी काही संबंध आहेत का, याचाही तपास पोलीस करत आहेत.
तिसरी घटना: याच दिवशी रात्री ९ वाजता प्रमोद महाजन गार्डनजवळ पोलिसांनी दोघांना ताब्यात घेतले. श्रीनिवास कानडे आणि मोहित तेजवाणी अशी या दोघांची नावे आहेत. कानडे याच्याकडून पिस्तूल तर तेजवाणीकडून दोन जिवंत काडतुसे सापडली. हे दोघेही कोणत्या गुन्हेगारी कृत्याची योजना आखत होते का, याचा तपास सुरू आहे. त्यांचेही इतर गुन्हेगारांशी काही संबंध आहेत का, याचीही माहिती पोलीस घेत आहेत.
या तीन घटनांमुळे नाशिकमध्ये बेकायदा शस्त्रास्त्रांचा पुरवठा करणारे मोठे रॅकेट कार्यरत असल्याचा संशय पोलिसांना आहे. या रॅकेटचा शोध घेण्यासाठी पोलिसांनी कसून तपास सुरू केला आहे. या घटनेमुळे नागरिकांमध्ये भीतीचे वातावरण पसरले आहे. नाशिककरांच्या सुरक्षेचा प्रश्न गंभीर बनला असून, पोलीस प्रशासनासमोर हे मोठे आव्हान उभे ठाकले आहे.
