पंचवटीतील दहशत माजवणारे तीन सराईत गुंड एकाचवेळी तडीपार; गुन्हेगारी वर्तुळात खळबळ
लाल 🚨 दिवा नाशिक,दि.३०:- पंचवटी परिसरात दहशत माजवणाऱ्या आणि खुनासारख्या गंभीर गुन्ह्यांत सहभागी असलेल्या एका खतरनाक टोळीच्या मुसक्या आवळण्यात नाशिक पोलिसांना मोठे यश आले आहे. या टोळीतील तीन सराईत गुन्हेगारांना एकाच वेळी तब्बल दोन वर्षांसाठी नाशिक जिल्ह्यातून हद्दपार करण्यात आले आहे. पोलीस उपायुक्त मोनिका राऊत यांनी हा धडाकेबाज निर्णय घेतला असून, या कारवाईमुळे गुन्हेगारी विश्वात मोठी खळबळ उडाली आहे.
- काय आहे प्रकरण?
पंचवटीतील फुलेनगर परिसरात मार्च २०२४ मध्ये या टोळीच्या प्रमुख साथीदाराचा अत्यंत निर्घृणपणे भोसकून खून करण्यात आला होता. या घटनेनंतर शहरात भीतीचे वातावरण पसरले होते. या प्रकरणातील आरोपी असलेले ऋषीकेश पवार, अमन सैय्यद आणि गोपाळ मोरे हे सराईत गुन्हेगार असून त्यांच्यावर पंचवटी, मुंबईनाका आणि नाशिक रोड पोलीस ठाण्यांमध्ये टोळीने दरोडा टाकणे, जबरी चोरी, आणि जीवघेणे हल्ले करणे असे अनेक गंभीर गुन्हे दाखल आहेत.
पोलिसांनी का उचलले हे कठोर पाऊल?
हे तिघेही गुन्हेगार समाजात मोकाट फिरत असल्याने त्यांच्याकडून पुन्हा गंभीर गुन्हे घडण्याची दाट शक्यता होती. आगामी सण-उत्सव आणि महानगरपालिका निवडणुकांच्या काळात कोणताही अनुचित प्रकार घडू नये व कायदा-सुव्यवस्था अबाधित राहावी, यासाठी प्रतिबंधात्मक उपाय म्हणून पोलीस आयुक्त श्री. संदीप कर्णिक यांच्या मार्गदर्शनाखाली उपायुक्त मोनिका राऊत यांनी या तिघांनाही जिल्ह्याबाहेरचा रस्ता दाखवला आहे.
या गुंडांना दाखवला बाहेरचा रस्ता:
गुन्हेगारांनो, आता तुमची खैर नाही!
परिमंडळ १ मधून आतापर्यंत एकूण १४ गुन्हेगारांना हद्दपार करण्यात आले असून, पोलिसांची ही धडक कारवाई यापुढेही अधिक जोमाने सुरू राहणार असल्याचा इशारा प्रशासनाने दिला आहे. पोलिसांच्या या कठोर पवित्र्यामुळे सामान्य नागरिकांनी सुटकेचा निःश्वास सोडला आहे.
