आयुक्तांच्या आदेशाने शहरात पहिल्यांदाच अनोखी कारवाई; गुन्हेगारी विश्वात प्रचंड खळबळ
लाल 🚨 दिवा-नाशिक, दि. २४ जुलै:शहरातील गुन्हेगारीची पाळेमुळे खणून काढण्यासाठी आणि सराईत गुन्हेगारांवर वचक निर्माण करण्यासाठी नाशिक शहर पोलीस दलाने आजवर कधीही न पाहिलेली एक धाडसी आणि यशस्वी कारवाई केली आहे. पोलीस आयुक्त श्री. संदीप कर्णिक यांच्या कठोर आदेशाने आणि मार्गदर्शनाखाली, शहरात प्रथमच ‘दिवसा कोम्बिंग ऑपरेशन’ राबविण्यात आले. काल (दि. २३) सकाळच्या वेळी, जेव्हा शहरवासी आपापल्या दैनंदिन कामात व्यस्त होते, तेव्हा पोलिसांच्या विविध पथकांनी एकाच वेळी शहराच्या कानाकोपऱ्यात धडक कारवाईचा सपाटा लावला. या अनपेक्षित कारवाईने गुन्हेगारी जगतात अक्षरशः भूकंप झाला असून, १६६ सराईत गुन्हेगारांना जेरबंद करण्यात पोलिसांना मोठे यश मिळाले आहे.
पोलीस आयुक्त श्री. संदीप कर्णिक यांनी शहरातील वाढत्या गुन्हेगारीला आळा घालण्यासाठी आणि अभिलेखावरील गुन्हेगारांवर नजर ठेवण्यासाठी सर्व पोलीस ठाणी व गुन्हे शाखांना कडक सूचना दिल्या होत्या. यानुसार, केवळ रात्रीच नव्हे, तर दिवसाही गुन्हेगार सक्रिय असू शकतात हे ओळखून, त्यांना कोणतीही संधी न देता पकडण्यासाठी ही अनोखी मोहीम आखण्यात आली.
काल सकाळी पोलीस आयुक्तालयातील सर्व पोलीस ठाण्यांचे अधिकारी, कर्मचारी आणि गुन्हे शाखेची विशेष पथके अचानकपणे रस्त्यावर उतरली. पूर्वनियोजित योजनेनुसार, त्यांनी सराईत गुन्हेगारांची घरे, अड्डे आणि लपण्याच्या संभाव्य जागांवर एकाच वेळी छापे टाकले. पोलीस अचानक दारात उभे राहिलेले पाहून अनेक गुन्हेगारांची झोपच उडाली. काही कळण्याच्या आतच पोलिसांनी त्यांना ताब्यात घेऊन पोलीस ठाण्यात आणले. या मोहिमेत एकूण १६६ सराईत गुन्हेगारांना ताब्यात घेऊन त्यांची कसून चौकशी करण्यात आली, तसेच त्यांच्या घरांची झडती घेण्यात आली.
या कारवाईमुळे गुन्हेगारी कारवाया करण्याच्या तयारीत असलेल्या अनेक गुन्हेगारांचे मनसुबे उधळले गेले आहेत. नाशिक पोलिसांच्या या धडक कारवाईने सामान्य नागरिकांमध्ये सुरक्षेची भावना वाढीस लागली असून, पोलिसांच्या कामगिरीचे सर्वत्र कौतुक होत आहे.
पोलीस ठाणेनिहाय कारवाईचा तपशील:
शहरातील सर्वच पोलीस ठाण्यांनी या मोहिमेत उत्कृष्ट कामगिरी बजावली. यामध्ये:
- नाशिकरोड: १४.
- भद्रकाली: १३
- गुन्हे शाखा युनिट-२:११
आडगाव, पंचवटी, म्हसरूळ, गंगापूर, मुंबईनाका, सातपूर, अंबड, इंदिरानगर, उपनगर, देवळाली कॅम्प, चुंचाळे चौकी, अंमली पदार्थ विरोधी पथक: प्रत्येकी १०
- सरकारवाडा: ०८
वरिष्ठांच्या मार्गदर्शनाखाली यशस्वी मोहीम
सदरची कौतुकास्पद कामगिरी पोलीस आयुक्त श्री. संदिप कर्णिक, पोलीस उप-आयुक्त (गुन्हे) श्री. किरणकुमार चव्हाण, पोलीस उप-आयुक्त (परिमंडळ-१) श्रीमती मोनिका राऊत, आणि पोलीस उप-आयुक्त (परिमंडळ-२) श्री. किशोर काळे यांच्यासह सर्व सहायक पोलीस आयुक्तांच्या मार्गदर्शनाखाली पोलीस आयुक्तालयातील सर्व पोलीस ठाण्यांच्या प्रभारी अधिकाऱ्यांनी संयुक्तपणे यशस्वी केली. या कारवाईने नाशिक पोलिसांचा दरारा पुन्हा एकदा सिद्ध झाला आहे.
