खाकी वर्दीतील खेळाडू सज्ज; मैदानावर दिसणार थरार आणि खिलाडूवृत्तीचा अनोखा संगम!
नाशिक, दि. १३: शहरातील कायदा आणि सुव्यवस्थेसाठी २४ तास दक्ष असणाऱ्या नाशिक पोलीस दलाच्या चेहऱ्यावर आज कर्तव्याच्या ताणाऐवजी खेळाचा उत्साह आणि जल्लोष ओसंडून वाहत होता. निमित्त होते, नाशिक शहर पोलीस आयुक्तालयातर्फे आयोजित ‘३६ व्या वार्षिक पोलीस क्रीडा स्पर्धा २०२५’ च्या उद्घाटन सोहळ्याचे! पोलीस कवायत मैदानावर आज सायंकाळी ४.०० वाजता ढोल-ताशांचा गजर आणि रणशिंगाच्या निनादात या भव्य क्रीडा महोत्सवाला दिमाखदार सुरुवात झाली.
आजवर गुन्हेगारांचा कर्दनकाळ ठरलेले कणखर हात आता मैदानावर कबड्डीचे डावपेच आखताना आणि धावण्याच्या शर्यतीत विजेतेपदासाठी सज्ज झालेले दिसले. पोलीस मुख्यालयाचे मैदान खेळाडूंच्या उत्साहाने आणि उपस्थितांच्या टाळ्यांच्या कडकडाटाने अक्षरशः दुमदुमून गेले होते. या शानदार सोहळ्याचे उद्घाटन नाशिक महानगर प्रदेश विकास प्राधिकरणाचे महानगर आयुक्त, मा. श्री. जलज शर्मा यांच्या हस्ते क्रीडाज्योत प्रज्वलित करून करण्यात आले. शुभारंभाची घोषणा केली, तेव्हा उपस्थित खेळाडू आणि अधिकाऱ्यांमध्ये नवचैतन्याचे वारे संचारले.
याप्रसंगी आपले मनोगत व्यक्त करताना मा. श्री. जलज शर्मा म्हणाले, “पोलिसांवरील प्रचंड ताणतणाव कमी करून त्यांच्यातील सांघिक भावना आणि शारीरिक तंदुरुस्ती वाढवण्यासाठी अशा स्पर्धा म्हणजे एक संजीवनी आहे. मैदानावर जिंकण्याची जिद्द ठेवणारा खेळाडूच समाजात एक उत्तम रक्षक म्हणून आपले कर्तव्य अधिक प्रभावीपणे बजावू शकतो.” त्यांच्या या शब्दांनी खेळाडूंचे मनोबल द्विगुणीत झाले.
या कार्यक्रमाचे मुख्य आयोजक आणि नाशिक शहराचे पोलीस आयुक्त मा. श्री. संदीप कर्णिक यांनी आपल्या प्रास्ताविकात या स्पर्धेमागील भूमिका स्पष्ट केली. ते म्हणाले, “ही स्पर्धा केवळ हार-जितीसाठी नाही, तर पोलीस दलातील प्रत्येक अधिकारी आणि कर्मचाऱ्याला एका धाग्यात गुंफणारा हा एक कौटुंबिक सोहळा आहे. यातून निर्माण होणारी ऊर्जा, खिलाडूवृत्ती आणि मैत्रीपूर्ण चुरस आम्हाला आमच्या दैनंदिन कर्तव्यात अधिक सक्षम बनवेल.”
कार्यक्रमाच्या समारोपात, पोलीस उपायुक्त (मुख्यालय व वाहतूक)
श्रीमती कीरिथिका सी. एम. यांनी उपस्थितांचे आभार मानले. त्यांच्या समयोचित आणि समर्पक शब्दांनी सोहळ्याची सुंदर सांगता झाली.
येत्या काही दिवसांत पोलीस कवायत मैदानावर कबड्डी, व्हॉलीबॉल, धावण्याच्या शर्यती, गोळाफेक, लांब उडी अशा विविध क्रीडा प्रकारांचा थरार अनुभवायला मिळणार आहे. शहरातील विविध पोलीस ठाणी आणि शाखांचे संघ एकमेकांसमोर उभे ठाकणार असून, ही स्पर्धा नाशिककरांसाठीही एक वेगळीच पर्वणी ठरणार आहे. या स्पर्धेने पोलीस दलात एक सकारात्मक आणि निरोगी स्पर्धेचे वातावरण निर्माण केले असून, आता सर्वांनाच उत्सुकता लागली आहे की, यावर्षी ‘विजेतेपदाचा करंडक’ कोण पटकावणार
