शरणपूर गोळीबार प्रकरणाची उलटी गिनती सुरू; फरार आरोपींच्या मुसक्या आवळण्यात पोलिसांना आतापर्यंतचे सर्वात मोठे यश!
लाल 🚨 दिवा-नाशिक, दि. १२:- ऑक्टोबर (विशेष प्रतिनिधी):नाशिक शहराला हादरवून सोडणाऱ्या शरणपूर रोड गोळीबार प्रकरणाच्या तपासात पोलिसांनी आतापर्यंतची सर्वात मोठी आणि निर्णायक कारवाई केली आहे. “नाशिक जिल्हा कायद्याचा बालेकिल्ला” या मालिकेच्या चौथ्या अंकात, शहर पोलिसांनी एकाच वेळी तिघांच्या मुसक्या आवळून बागुल गँगचा कणाच मोडला आहे. गुन्हेगारी रेकॉर्डवर फरार असलेला मुख्य सूत्रधार अजय बागुल याच्यासह त्याचे दोन महत्त्वाचे साथीदार कुमावत आणि पप्पू जाधव यांना साहेब हॉटेल परिसरातून मोठ्या शिताफीने ताब्यात घेण्यात आले आहे. या तिहेरी अटकेने गुन्हेगारी विश्वात प्रचंड खळबळ उडाली आहे.
‘मामा’ राजवाडे याच्या अटकेनंतर पोलीस कोठडीत मिळालेल्या माहितीच्या आधारे आणि गुन्हे शाखेच्या गुप्त खबऱ्यांकडून मिळालेल्या अचूक माहितीनुसार, अजय बागुल आपल्या साथीदारांसह शहराच्या मध्यवर्ती भागात असलेल्या साहेब हॉटेल परिसरात लपून बसल्याचे समोर आले होते. या माहितीची खातरजमा होताच, वरिष्ठ अधिकाऱ्यांच्या मार्गदर्शनाखाली पोलिसांनी अत्यंत गोपनीय पद्धतीने या परिसराला घेरले. आरोपींना पळून जाण्याची कोणतीही संधी न देता, पोलिसांनी छापा टाकून अजय बागुल, कुमावत आणि पप्पू जाधव या तिघांनाही ताब्यात घेतले.
आता उलगडणार संपूर्ण कट
अजय बागुल हा या संपूर्ण कटाचा ‘किंगपिन’ मानला जात होता, तर कुमावत आणि पप्पू जाधव हे त्याचे उजवे-डावे हात म्हणून काम करत होते. या तिघांच्या अटकेमुळे आता या गुन्ह्यामागील संपूर्ण कट उघड होणार आहे. हल्ल्याचा नेमका उद्देश काय होता? शस्त्रे कोणी आणि कुठून पुरवली? आणि या कटात पडद्यामागे आणखी कोण होते? या सर्व प्रश्नांची उत्तरे आता पोलिसांना मिळणार आहेत.
या तिहेरी अटकेमुळे फरार असलेले मुख्य आरोपी तुकाराम चोथवे आणि अजय बोरीसा यांच्याभोवतीचा फास पूर्णपणे आवळला गेला आहे. त्यांच्यापर्यंत पोहोचणे आता पोलिसांसाठी केवळ काही तासांचे काम उरले आहे, असा दृढ विश्वास पोलीस सूत्रांनी व्यक्त केला आहे. या धडक कारवाईने नाशिक पोलिसांनी पुन्हा एकदा सिद्ध केले आहे की, शहरात गुन्हेगारांना थारा नाही आणि इथे फक्त कायद्याचेच राज्य चालेल.
