खून, दरोडा ते चेन स्नॅचिंग; गुन्हेगारीचा ‘चालता-बोलता इतिहास’ असलेले तिघे जेरबंद.
लाल 🚨 दिवा-नाशिक -नांदगाव, दि. १० ऑगस्ट: रक्षाबंधनासाठी माहेरी निघालेल्या बहिणीच्या गळ्यातील मंगळसूत्र हिसकावणे आंतरजिल्हा टोळीच्या चांगलेच अंगलट आले आहे. नाशिक शहरासह विविध जिल्ह्यांमध्ये तब्बल २४ गुन्हे दाखल असलेला आणि मोक्का कायद्यान्वये कारवाई झाल्यापासून तब्बल वर्षभर पोलिसांना गुंगारा देणारा कुख्यात गुन्हेगार सोमनाथ खलाटे याला त्याच्या दोन साथीदारांसह जेरबंद करण्यात नाशिक ग्रामीण पोलिसांच्या स्थानिक गुन्हे शाखेला मोठे यश आले आहे. या कारवाईमुळे चेन स्नॅचिंगच्या अनेक गुन्ह्यांची उकल होण्याची शक्यता वर्तवण्यात येत आहे.
नेमके काय घडले?
दिनांक ०९ ऑगस्ट रोजी, रक्षाबंधनाच्या दिवशी, चाळीसगाव तालुक्यातील करंजगाव येथील एक महिला आपल्या भावाला राखी बांधण्यासाठी मनमाडला जात होत्या. नांदगाव शहरातील मनमाड रोडवरील हॉटेल राज गार्डनसमोर भरधाव वेगात आलेल्या टीव्हीएस अपाचे मोटर सायकलवरील तीन अज्ञात इसमांनी क्षणात त्यांच्या गळ्यातील सुमारे ९०,००० रुपये किमतीचे सोन्याचे मंगळसूत्र ओरबाडून पोबारा केला. दिवसाढवळ्या घडलेल्या या घटनेने शहरात एकच खळबळ उडाली होती. याप्रकरणी नांदगाव पोलीस ठाण्यात गुन्हा दाखल करण्यात आला होता.
पोलिसांनी असा आवळला फास!
घटनेचे गांभीर्य ओळखून पोलीस अधीक्षक श्री. बाळासाहेब पाटील यांनी तातडीने तपासाचे आदेश दिले. स्थानिक गुन्हे शाखेचे पोलीस निरीक्षक श्री. रविंद्र मगर यांच्या नेतृत्वाखालील पथकाने तपासाची चक्रे वेगाने फिरवली. पोलिसांनी घटनास्थळावरील तांत्रिक पुरावे आणि गुप्त बातमीदारांचे जाळे वापरून आरोपींच्या वर्णनावरून आणि त्यांच्या पल्सर मोटर सायकलच्या मार्गावरून माग काढला. आरोपी अहिल्यानगर जिल्ह्याच्या दिशेने पसार झाल्याची पक्की खबर मिळताच, पोलिसांनी सापळा रचून तीन संशयितांना वेगवेगळ्या ठिकाणांहून उचलले.
पोलिसी खाक्या दाखवताच आरोपींनी तोंड उघडले. सोमनाथ रामदास खलाटे (वय ३०, रा. खलाटेवाडी, ता. आष्टी, जि. बीड), किरण अर्जुन आजबे (वय ३४, रा. भिंगार, जि. अहिल्यानगर) आणि दिगंबर हरिचंद्र निकम (वय ३०, रा. झारूळ, ता. वैजापूर, जि. छत्रपती संभाजीनगर) अशी अटक केलेल्या आरोपींची नावे आहेत. त्यांनीच नांदगाव येथे महिलेच्या गळ्यातील पोत हिसकावल्याची कबुली दिली. चोरलेले मंगळसूत्र त्यांनी अहिल्यानगर जिल्ह्यातील लोणी येथील एका सोनाराला विकल्याचेही सांगितले. गुन्ह्यासाठी वापरलेली टीव्हीएस अपाचे मोटर सायकल (क्र. एम.एच.१७.डी.बी.१२६५) पोलिसांनी जप्त केली आहे.
आरोपी नाही, गुन्हेगारीचा ‘चालता-बोलता इतिहास’!
या टोळीचा म्होरक्या सोमनाथ खलाटे हा सराईत गुन्हेगार असून त्याच्यावर नाशिक शहरातील आडगाव, पंचवटी, भद्रकाली, गंगापूर, मुंबईनाका, अंबड, इंदिरानगर, नाशिकरोड, म्हसरूळ तसेच बुलढाणा आणि शनिशिंगणापूर पोलीस ठाण्यांमध्ये चेन स्नॅचिंग आणि चोरीचे तब्बल २४ गुन्हे दाखल आहेत. नाशिक शहर पोलिसांनी त्याच्यावर मोक्का कायद्यान्वये कारवाई केली होती, तेव्हापासून तो फरार होता.
त्याचे साथीदारही कमी नाहीत. किरण आजबे याच्यावर खून, दरोडा, चोरी, आर्म्स ॲक्टसारखे ११ गंभीर गुन्हे, तर दिगंबर निकम याच्यावर खून आणि मारामारीचे गंभीर गुन्हे दाखल आहेत. या तिघांच्या अटकेमुळे अनेक प्रलंबित गुन्हे उघडकीस येण्याची शक्यता आहे.
पोलीस अधीक्षक श्री. बाळासाहेब पाटील यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. रविंद्र मगर आणि त्यांच्या पथकाने ही धाडसी कारवाई करून आंतरजिल्हा टोळीच्या मुसक्या आवळल्या आहेत. त्यांच्या या उल्लेखनीय कामगिरीचे सर्वत्र कौतुक होत आहे.
