वर्षभराच्या थरारनाट्याचा क्लायमॅक्स; २६ ऑगस्टपर्यंत पोलीस कोठडी, आता होणार धक्कादायक खुलासे!
लाल 🚨 दिवा-नाशिक,दि.२३:– शहराला हादरवून सोडणाऱ्या गुरुपाल सिंह सेठी उर्फ राजा हत्याकांडात अखेर गुन्हे शाखेला मोठे यश मिळाले आहे. वर्षभरापासून पोलिसांच्या हातावर तुरी देत, थेट तीर्थक्षेत्र शिर्डीत आश्रय घेतलेल्या मुख्य संशयित माय-लेक मनजितकौर चड्डा आणि तेजकिरत सिंह चड्डा यांच्या मुसक्या आवळण्यात आल्या आहेत. मुंबई नाका पोलिसांकडून हा तपास गुन्हे शाखा युनिट १ कडे सोपवताच त्यांनी ही धडक कारवाई केली, ज्यामुळे या प्रकरणाच्या तपासाला आता वेगळीच कलाटणी मिळाली आहे.
काय आहे थरारक प्रकरण?
७ जुलै २०२३ रोजी गुरुपाल सिंह सेठी उर्फ राजा यांचा त्यांच्या राहत्या घरी संशयास्पद मृत्यू झाला होता. घरात सुरू असलेले आर्थिक व्यवहार आणि कौटुंबिक वादातून त्यांचा मानसिक छळ करून त्यांना मृत्यूच्या दारात ढकलल्याचा गंभीर आरोप फिर्यादी अभिजित गुजराल यांनी केला होता. हा साधा मृत्यू नसून, एक थंड डोक्याने केलेला खून आहे, असा दावा त्यांनी केल्याने शहरात एकच खळबळ उडाली होती. गुन्हा दाखल होताच या प्रकरणातील सर्व संशयित पसार झाले होते
गुन्हे शाखेची शिर्डीत धडक कारवाई !
प्रकरणाचे गांभीर्य लक्षात घेऊन हा तपास गुन्हे शाखा युनिट १ कडे वर्ग करण्यात आला होता. वरिष्ठ पोलीस निरीक्षक मधुकर कड यांच्या नेतृत्वाखालील पथकाने या फरार आरोपींचा माग काढण्यास सुरुवात केली. तांत्रिक तपासाच्या आधारे हे माय-लेक शिर्डीत लपल्याची पक्की खबर मिळताच, पथकाने सापळा रचून अत्यंत शिताफीने दोघांनाही जेरबंद केले. देवाच्या दारात लपून आपल्या पापांवर पांघरूण घालण्याचा त्यांचा डाव होता, पण तो गुन्हे शाखेच्या तीक्ष्ण नजरेतून सुटू शकला नाही.
२६ ऑगस्टपर्यंत पोलीस कोठडी !
अटक केल्यानंतर दोघांनाही न्यायालयात हजर करण्यात आले असता, न्यायालयाने त्यांना २६ ऑगस्टपर्यंत पोलीस कोठडी सुनावली आहे. या कोठडीदरम्यान आता या हत्याकांडामागील नेमका कट, त्यामागचा खरा हेतू आणि यात आणखी कुणाचा सहभाग होता का, यावरचा पडदा उठणार आहे. या अटकेमुळे काही दिवसांपूर्वी पकडण्यात आलेला तिसरा आरोपी शरणसिंह गिल याच्या चौकशीलाही नवी दिशा मिळण्याची शक्यता आहे गुन्हे शाखेच्या कामगिरीचे कौतुक
वर्षभरापासून रखडलेल्या आणि अत्यंत गुंतागुंतीच्या बनलेल्या या गुन्ह्याची उकल करण्यात गुन्हे शाखा युनिट १ ने दाखवलेल्या तत्परतेचे आणि कौशल्याचे सर्वत्र कौतुक होत आहे. वरिष्ठ पोलीस अधिकारी मधुकर कड यांच्या मार्गदर्शनाखाली आता या प्रकरणाचा लवकरच पूर्णपणे छडा लागेल, अशी अपेक्षा व्यक्त केली जात आहे.
या पथकाने केली कारवाई:
वरिष्ठ पोलीस निरीक्षक मधुकर कड यांच्या मार्गदर्शनाखाली पीएसआय चेतन श्रीवत, पोलीस हवालदार राहुल पालखेडे, महिला पोलीस हवालदार मनीषा सरोदे, पोलीस हवालदार बर्डे राम, अप्पा पाणवळ, चालक पवार, पोलीस हवालदार महेश साळुंखे, लिलके आणि बोरसे यांच्या पथकाने ही कामगिरी केली.
