खेळाडूंच्या स्वप्नांचे ‘सारथी’ बनले सुधाकर बडगुजर; पाटीलनगर मैदानावर विकासाचा ‘चौकार-षटकार’!
पोलीस भरती आणि क्रीडा सरावासाठी आता चिंता नको; बडगुजरांच्या ‘मास्टर प्लॅन’ने मैदान होणार स्मार्ट!
लाल 🚨 दिवा-नाशिक ,दि.१:-(विशेष प्रतिनिधी):सिडकोतील खेळाडूंची ‘कर्मभूमी’ आणि हजारो तरुणांच्या स्वप्नांचे ‘माहेरघर’ असलेल्या पाटीलनगर मैदानावर लवकरच सुविधांची आतषबाजी होणार आहे! खेळाडूंच्या उज्ज्वल भविष्यासाठी आणि आरोग्यप्रेमींच्या सुरक्षिततेसाठी भाजपाचे ज्येष्ठ नेते व नगरसेवक **सुधाकर बडगुजर** यांनी पुढाकार घेतला असून, त्यांच्या या ‘क्रीडा क्रांती’च्या निर्णयामुळे संपूर्ण नवीन नाशिक परिसरात आनंदाची लाट पसरली आहे. “खेळाडूंचे स्वप्न, हेच आमचे ध्येय,” या उक्तीप्रमाणे बडगुजर यांनी मैदानाचा संपूर्ण कातपालट करण्याचा विडा उचलला आहे.
मैदानाचे रुपडे पालटणार; ‘व्हिजनरी’ प्लान तयार
पाटीलनगर मैदान हे केवळ मातीचे मैदान नसून ती पोलीस भरतीची तयारी करणाऱ्या गरीब व होतकरू तरुणांची ‘आयर्लंड’ आहे. मात्र, अपुऱ्या सुविधांमुळे खेळाडूंच्या नैपुण्याला मर्यादा येत होत्या. ही बाब हेरून येथील जागरूक खेळाडू आणि विद्यार्थ्यांनी थेट लोकनेते सुधाकर बडगुजर यांना साकडे घातले. खेळाडूंच्या समस्या ऐकून केवळ आश्वासन न देता, “तुम्ही खेळावर लक्ष द्या, सुविधांची जबाबदारी माझी,” असा खंबीर शब्द बडगुजर यांनी दिल्याने तरुणाईमध्ये नवचैतन्य संचारले आहे.
काय आहे खेळाडूंचा आणि बडगुजर यांचा ‘मास्टर प्लॅन’?
खेळाडूंनी सादर केलेल्या निवेदनात मैदानाच्या सर्वांगीण विकासाचा आराखडाच मांडला आहे, ज्याला बडगुजर यांनी सकारात्मक दुजोरा दिला आहे:
१. हायटेक प्रकाशझोत (Flood Lights):सध्या मैदानाच्या मध्यभागी असलेला हायमास्ट खांब खेळाला अडथळा ठरत आहे. तो हटवून आता आंतरराष्ट्रीय स्टेडियमच्या धर्तीवर मैदानाच्या चारही कोपऱ्यात भव्य ‘फ्लड लाईट्स’ बसवले जातील, ज्यामुळे मैदान मोकळे तर होईलच, पण रात्रौही सराव करणे शक्य होईल.
२. अखंड आणि भव्य मैदान:सध्या दोन टप्प्यात विभागलेले मैदान एकसलग करून त्याचे सपाटीकरण केले जाईल. यामुळे खेळाडूंना विस्तीर्ण जागा मिळेल.
३. सुरक्षिततेचे ‘कवचकुंडले’:क्रिकेटचा चेंडू लागून मॉर्निंग वॉक करणाऱ्यांना इजा होऊ नये, यासाठी जॉगिंग ट्रॅक आणि मुख्य मैदान या दरम्यान संरक्षक जाळी (Safety Net) बसवण्यात येणार आहे. यामुळे वॉकर आणि खेळाडू दोघेही बिनधास्तपणे मैदानाचा आनंद लुटू शकतील.
४. पोलीस भरतीसाठी ‘स्मूथ ट्रॅक’:पोलीस भरतीसाठी धावणाऱ्या तरुणांसाठी प्रत्येक सेकंद महत्त्वाचा असतो. त्यामुळे जॉगिंग ट्रॅकचे तीक्ष्ण कोपरे (Sharp Corners) काढून ते ‘स्मूथ कर्व्ह’ (Smooth Curve) मध्ये रूपांतरीत करण्याची अत्यंत कल्पक मागणी पुढे आली आहे, ज्यामुळे धावपटूंचा वेग वाढण्यास मदत होईल.
५. बॉक्स क्रिकेट आणि टर्फ: अर्धवट राहिलेले बॉक्स क्रिकेटचे काम पूर्ण करून ते तरुणांसाठी खुले केले जाईल. तसेच क्रिकेटपटूंसाठी सिमेंट काँक्रीटची दर्जेदार धावपट्टी आणि दोन ‘सीझन बॉल पीच’ तयार केले जातील.
६. संगीताचा आनंद:पहाटे व्यायाम करणाऱ्या ज्येष्ठ नागरिकांसाठी आणि महिलांसाठी जॉगिंग ट्रॅकवर स्पीकर लावून ‘एफएम’ची सुविधा सुरू करण्याची मागणीही करण्यात आली आहे.
सुधाकर बडगुजर यांचा ‘ॲक्शन मोड’
शंभरहून अधिक विद्यार्थ्यांच्या सह्यांचे हे निवेदन स्वीकारताना सुधाकर बडगुजर यांनी तात्काळ ॲक्शन मोडमध्ये येत खेळाडूंना आश्वस्त केले. “सिडकोतील खेळाडू राज्य आणि राष्ट्र पातळीवर चमकावेत, हे माझे स्वप्न आहे. या मैदानाचा प्रश्न मी वैयक्तिक पातळीवर हाताळणार असून, महापालिका आयुक्तांशी चर्चा करून या सर्व मागण्या तातडीने मंजूर करून घेईन,” असे वचन बडगुजर यांनी दिले.
सुधाकर बडगुजर यांच्यासारख्या विकासपुरूष नेत्याची साथ मिळाल्याने पाटीलनगर मैदान लवकरच नाशिकमधील सर्वात सुसज्ज आणि ‘मॉडेल ग्राऊंड’ म्हणून नावारूपाला येईल, यात तीळमात्र शंका नाही. खेळाडूंची जिद्द आणि बडगुजरांचे पाठबळ, या समीकरणाने सिडकोच्या क्रीडा क्षेत्रात आनंदाचे वातावरण निर्माण झाले आहे.
