नाशिकसह ठाणे, संभाजीनगर, अहिल्यानगरमध्ये धुमाकूळ; पावणेचार लाखांच्या १९ मोटारसायकली जप्त!
लाल 🚨 दिवा-नाशिक, दि. ,९:- सप्टेंबर: शहरात गेल्या काही महिन्यांपासून मोटारसायकल चोरीच्या घटनांनी नागरिकांमध्ये भीतीचे वातावरण पसरले होते. मात्र, मुंबईनाका पोलिसांनी एका अशा अट्टल चोरट्याला जेरबंद केले आहे, ज्याची कार्यपद्धती ऐकून तुम्हीही थक्क व्हाल! उजव्या हाताने अपंग असल्याचा गैरफायदा घेत, लोकांची सहानुभूती मिळवून त्यांच्या डोळ्यांदेखत बनावट चावीने बाईक चोरणाऱ्या आंतरजिल्हा टोळीतील सराईत गुन्हेगाराच्या मुसक्या आवळण्यात पोलिसांना यश आले आहे.
गौसआजम अजीज शेख (वय २४, रा. तडवीनगर, मालेगाव) असे या चलाख चोराचे नाव असून, त्याच्याकडून तब्बल ३ लाख ७५ हजार रुपये किमतीच्या १९ मोटारसायकली हस्तगत करण्यात आल्या आहेत. या कारवाईमुळे नाशिकसह ठाणे, छत्रपती संभाजीनगर आणि अहिल्यानगर येथील अनेक गुन्हे उघडकीस आले आहेत.
असा लागला छडा…
शहरात वाढत्या बाईक चोरीच्या घटनांना आळा घालण्यासाठी पोलीस आयुक्त श्री. संदीप कर्णिक यांनी कठोर कारवाईचे आदेश दिले होते. दरम्यान, १६ जुलै रोजी द्वारका येथील कांदा-बटाटा भवनातून महेश कोरडे यांची एच.एफ. डिलक्स (MH-15 DY 3394) मोटारसायकल चोरीला गेली होती. याप्रकरणी मुंबईनाका पोलीस ठाण्यात गुन्हा दाखल होता.
या गुन्ह्याचा तपास सुरू असताना, ३ सप्टेंबर रोजी गुन्हे शोध पथकाचे पोलीस अंमलदार नवनाथ उगले यांना एक खबऱ्याकडून पक्की माहिती मिळाली. एक संशयित व्यक्ती द्वारका परिसरात संशयास्पदरीत्या फिरत असून तो पार्क केलेल्या गाड्यांभोवती घुटमळत आहे. क्षणाचाही विलंब न लावता पोलीस उपनिरीक्षक समद बेग यांच्या नेतृत्वाखालील पथकाने सापळा रचला आणि त्या व्यक्तीला शिताफीने ताब्यात घेतले. चौकशीत त्याने उडवाउडवीची उत्तरे दिल्याने पोलिसांचा संशय बळावला. त्याला पोलीस ठाण्यात आणून खाकी वर्दीचा हिसका दाखवताच तो पोपटासारखा बोलू लागला.
अपंगत्व हेच त्याचे शस्त्र!
आरोपी गौसआजम हा उजव्या हाताने अपंग आहे. त्यामुळे त्याच्यावर कोणी संशय घेत नसे. याच गोष्टीचा फायदा उचलून तो गर्दीच्या ठिकाणी पार्क केलेल्या, विशेषतः हिरो कंपनीच्या पॅशन प्रो आणि एच.एफ. डिलक्स गाड्यांना लक्ष्य करत असे. बनावट चाव्यांच्या मदतीने तो अवघ्या काही क्षणांत बाईक घेऊन पसार व्हायचा. त्याने नाशिक, ठाणे, संभाजीनगर, अहिल्यानगर अशा विविध शहरांतून गाड्या चोरल्याची कबुली दिली.
पोलिसांची धडक कारवाई, १९ गाड्या जप्त!
आरोपीच्या कबुलीनंतर पोलीस निरीक्षक संतोष नरूटे आणि सहायक पोलीस निरीक्षक सुधीर पाटील यांनी तात्काळ एक पथक मालेगावला रवाना केले. आरोपीने दिलेल्या माहितीनुसार, पोलिसांनी अत्यंत कौशल्याने तपास करत वेगवेगळ्या ठिकाणांहून चोरीच्या एकूण १९ मोटारसायकली जप्त केल्या. या कारवाईमुळे अनेक नागरिकांना त्यांच्या चोरीला गेलेल्या गाड्या परत मिळण्याची आशा निर्माण झाली आहे.
जप्त केलेल्या प्रमुख मोटारसायकली:
आणखी गुन्हे उघड होण्याची शक्यता
आरोपी गौसआजम याला न्यायालयाने १० सप्टेंबरपर्यंत पोलीस कोठडी सुनावली आहे. त्याच्या टोळीत आणखी साथीदार असण्याची शक्यता असून पोलीस त्या दिशेने तपास करत आहेत. या मोठ्या कारवाईबद्दल पोलीस आयुक्त श्री. संदीप कर्णिक, पोलीस उपआयुक्त श्रीमती मोनिका राऊत यांनी मुंबईनाका पोलिसांच्या गुन्हे शोध पथकाचे कौतुक केले आहे. नागरिकांनी आपली वाहने सुरक्षित ठिकाणी पार्क करावीत आणि सतर्क राहावे, असे आवाहन नाशिक शहर पोलिसांतर्फे करण्यात आले आहे.
