एकाच वेळी अनेक हवामान प्रणाली सक्रिय; कोकण, मध्य महाराष्ट्रात अतिवृष्टी, तर मराठवाड्यालाही मुसळधार पावसाचा इशारा.
लाल 🚨 दिवा-नाशिक मुंबई, १८ ऑगस्ट: बंगालच्या उपसागरात निर्माण झालेले कमी दाबाचे क्षेत्र आणि त्याला पूरक ठरलेल्या इतर हवामान प्रणालींमुळे संपूर्ण महाराष्ट्रावर पावसाचे महासंकट घोंघावत आहे. भारतीय हवामान विभागाने (IMD) आज, १८ ऑगस्ट रोजी सकाळी एक विशेष प्रसिद्धीपत्रक जारी करत, येत्या १८ ते २१ ऑगस्ट या चार दिवसांच्या कालावधीत राज्याला मुसळधार ते अतिवृ’ष्टीचा जबरदस्त तडाखा बसणार असल्याचा खळबळजनक इशारा दिला आहे. या काळात नागरिकांनी सतर्क राहावे, असे आवाहन प्रशासनाने केले आहे.
काय आहे धोक्याची घंटा?
हवामान विभागाच्या माहितीनुसार, बंगालच्या उपसागरात एक तीव्र कमी दाबाचे क्षेत्र (Well Marked Low Pressure Area) तयार झाले असून, येत्या १२ तासांत ते आणखी तीव्र होऊन ‘डिप्रेशन’मध्ये रूपांतरित होण्याची शक्यता आहे. या प्रणालीसोबतच अरबी समुद्रातील चक्रीय वाऱ्यांची स्थिती, सक्रिय झालेला मान्सूनचा आस आणि हवेच्या दाबातील बदलांमुळे राज्यात पावसासाठी अत्यंत पोषक वातावरण निर्माण झाले आहे. या सर्व प्रणालींच्या एकत्रित आणि विनाशकारी प्रभावामुळे पुढचे चार दिवस राज्यासाठी अत्यंत महत्त्वाचे आणि धोक्याचे ठरणार आहेत.
कुठे कोसळणार आभाळ?
कोकण आणि घाटमाथा: हवामान विभागाच्या अंदाजानुसार, या नैसर्गिक तांडवाचा सर्वाधिक फटका कोकण किनारपट्टी आणि मध्य महाराष्ट्राच्या घाटमाथ्याला बसणार आहे. या भागांमध्ये पुढील ९६ तासांत मुसळधार ते अतिमुसळधार (Heavy to Very Heavy) पाऊस कोसळेल, तर काही ठिकाणी अक्षरशः ढगफुटीसदृश म्हणजेच अतिवृष्टी (Extremely Heavy Rainfall) होण्याची भीती व्यक्त करण्यात आली आहे.
मराठवाडा: मराठवाड्यालाही या पावसाच्या तडाख्यातून सूट मिळणार नाही. या विभागात अनेक ठिकाणी विखुरलेल्या स्वरूपात जोरदार ते अतिजोरदार पावसाची शक्यता वर्तवण्यात आली आहे, ज्यामुळे आधीच संकटात असलेल्या शेतकऱ्यांची चिंता वाढली आहे.
विजांचा कडकडाट आणि वादळी वारे: केवळ पाऊसच नव्हे, तर या काळात विजांचा कडकडाट आणि मेघगर्जनेसह ताशी ४० ते ५० किलोमीटर वेगाने वादळी वारे वाहण्याचाही अंदाज आहे. त्यामुळे झाडे उन्मळून पडण्याच्या आणि विद्युतप्रवाह खंडित होण्याच्या घटना घडू शकतात.
प्रशासनाचा इशारा
या पार्श्वभूमीवर, प्रशासनाने नदीकाठच्या गावांना, दरडप्रवण भागातील नागरिकांना आणि सखल भागांत राहणाऱ्या लोकांना विशेष खबरदारी घेण्याचे आवाहन केले आहे. मच्छीमारांना समुद्रात न जाण्याचा सल्ला देण्यात आला असून, नागरिकांनी विनाकारण घराबाहेर पडू नये, असेही सांगण्यात आले आहे.
