गुन्हे शाखेच्या युनिट १ ची थरारक कारवाई; नाशिक शहर आणि ग्रामीण पोलिसांच्या रेकॉर्डवरील ‘हिस्ट्री-शीटर’ जेरबंद
लाल 🚨 दिवा-नाशिक,दि.२३:-: “येथे कायदा नाही, मीच कायदा आहे,” अशा अविर्भावात भरदिवसा, भरचौकात कमरेला पिस्तूल लावून दहशत माजवणाऱ्या कुख्यात गुन्हेगाराची मस्ती अखेर नाशिक शहर गुन्हे शाखेच्या पोलिसांनी उतरवली आहे. नाशिक शहर आणि ग्रामीण पोलिसांच्या रेकॉर्डवरील ‘मोस्ट वॉन्टेड’ असलेल्या भरत जगताप या सराईत गुन्हेगाराच्या मुसक्या आवळून गुन्हे शाखा युनिट १ च्या पथकाने एक धडाकेबाज कामगिरी केली आहे. या कारवाईमुळे अंबड परिसरात पसरलेले दहशतीचे सावट दूर झाले आहे.
शहरातील अवैध शस्त्रधारी गुंडांवर वचक बसवण्यासाठी पोलीस आयुक्त श्री. संदिप कर्णिक यांनी “ऑपरेशन क्लीन”चे आदेश दिले होते. याच मोहिमेअंतर्गत गुन्हे शाखेचे पथक गुन्हेगारांवर करडी नजर ठेवून होते. दिनांक २२ सप्टेंबर रोजी, गुन्हे शाखेच्या खबऱ्यांचे जाळे किती भेदक आहे याचा प्रत्यय पुन्हा एकदा आला. पोलीस हवालदार विशाल काठे व विशाल देवरे यांना त्यांच्या गुप्त बातमीदाराकडून पक्की खबर मिळाली की, अनेक गुन्ह्यांमध्ये पोलिसांना हवा असलेला भरत जगताप हा लेखा नगरच्या स्टेट बँक चौकात खुलेआम पिस्तूल घेऊन फिरत आहे आणि नागरिकांमध्ये दहशत निर्माण करत आहे.
माहिती मिळताच वरिष्ठ पोलीस निरीक्षक मधुकर कड यांनी क्षणाचाही विलंब न लावता आपल्या सर्वात धाडसी अधिकाऱ्यांचे पथक तयार केले. पोलीस उपनिरीक्षक चेतन श्रीवंत, सुदाम सांगळे यांच्या नेतृत्वात पथकाने अत्यंत गुप्तपणे सापळा रचला. पोलिसांची चाहूल लागताच भरत जगतापने पळून जाण्याचा प्रयत्न केला, पण चोहोबाजूंनी वेढा घातलेल्या पथकाने त्याच्यावर झडप घालून त्याला जागीच जेरबंद केले. त्याची झडती घेतली असता, त्याच्याकडे तब्बल ३०,००० रुपये किमतीचे एक जीवघेणे देशी बनावटीचे पिस्तूल सापडले.
गुन्हेगारीचा बादशाह!
पकडलेला आरोपी भरत जगताप (वय ३३) हा कोणी साधासुधा गुन्हेगार नाही, तर त्याच्या नावावर गुन्ह्यांची एक लांबलचक यादी आहे. सायखेडा, निफाड, लासलगाव ते पंचवटीपर्यंत त्याच्या गुन्हेगारीचे साम्राज्य पसरले होते. खून, खुनाचा प्रयत्न, सरकारी कामात अडथळा, अवैध वाळू उपसा, दरोडा, मारामारी आणि घरात घुसून हल्ला करण्यासारखे तब्बल ९ गंभीर गुन्हे त्याच्यावर दाखल आहेत.
या ताज्या प्रकरणात, अंबड पोलीस ठाण्यात त्याच्याविरुद्ध भारतीय हत्यार कायद्यान्वये गुन्हा दाखल करण्यात आला असून, त्याला पुढील तपासासाठी पोलिसांच्या ताब्यात देण्यात आले आहे.
ही यशस्वी कामगिरी पोलीस आयुक्त श्री. संदिप कर्णिक, उपायुक्त श्री. किरणकुमार चव्हाण आणि सहायक आयुक्त श्री. संदिप मिटके यांच्या मार्गदर्शनाखाली वरिष्ठ पोलीस निरीक्षक श्री. मधुकर कड आणि त्यांच्या संपूर्ण टीमने यशस्वीरित्या पार पाडली. या कारवाईने नाशिक पोलिसांच्या शिरपेचात आणखी एक मानाचा तुरा खोवला आहे.
