पोलीस अधीक्षक बाळासाहेब पाटील यांच्या हस्ते ४० अत्याधुनिक दुचाकींचे महिला मदत कक्षांना वितरण; दुर्गम भागातील महिलांना मिळणार त्वरित मदत.
लाल 🚨 दिवा-नाशिक, दि. २४ (आमच्या विशेष प्रतिनिधीकडून)नाशिक ग्रामीण जिल्ह्यातील महिलांच्या सुरक्षेला अभेद्य कवच पुरवण्याच्या दृष्टीने पोलीस दलाने एक ऐतिहासिक आणि महत्त्वपूर्ण पाऊल उचलले आहे. महिलांवरील अत्याचारांना वेळीच पायबंद घालण्यासाठी आणि पीडित महिलांना तात्काळ मदत पोहोचवण्यासाठी जिल्हा पोलीस अधीक्षक श्री. बाळासाहेब पाटील यांच्या दूरदृष्टीतून जिल्ह्यातील ४० पोलीस ठाण्यांमधील महिला मदत कक्षांना (वुमेन हेल्प डेस्क) अत्याधुनिक सोयींनी युक्त अशा ४० नवीन मोपेड दुचाकींचे वितरण करण्यात आले. या धाडसी उपक्रमामुळे ग्रामीण आणि दुर्गम भागातील महिलांच्या मनात सुरक्षिततेची भावना अधिक दृढ होणार असून, गुन्हेगारी प्रवृत्तींना जबर हादरा बसणार आहे.
पोलीस मुख्यालय, आडगाव येथे आयोजित करण्यात आलेल्या एका शानदार सोहळ्यात, पोलीस अधीक्षक श्री. बाळासाहेब पाटील यांच्या हस्ते या दुचाकी महिला पोलीस अधिकारी आणि अंमलदारांच्या स्वाधीन करण्यात आल्या. यावेळी पोलीस दलातील वरिष्ठ अधिकारी, अपर पोलीस अधीक्षक श्री. आदित्य मिरखेलकर, पोलीस उपअधीक्षक मुख्यालय श्री. नितीनकुमार गोकावे, राखीव पोलीस निरीक्षक श्री. पंडीत चव्हाण, आणि मोटार परिवहन विभागाचे श्री. अनिल घाडगे यांच्यासह जिल्ह्यातील महिला अधिकारी मोठ्या संख्येने उपस्थित होत्या. श्री. बाळासाहेब पाटील यांनी हिरवा झेंडा दाखवताच, चाळीसही दुचाकी नव्या दमाने, नव्या उत्साहाने नारीशक्तीच्या रक्षणासाठी मार्गस्थ झाल्या.
- निर्भया निधीचा योग्य वापर; पोलिसांची दूरदृष्टी
केंद्र आणि राज्य शासनाच्या समन्वयातून महिलांच्या सुरक्षेसाठी राबविण्यात येणाऱ्या ‘निर्भया फंड’ योजनेअंतर्गत नाशिक ग्रामीण पोलीस दलाने हा निधी अत्यंत प्रभावीपणे वापरला आहे. नॅशनल क्राईम रिसर्च ब्युरो, नवी दिल्ली यांच्याकडून प्राप्त निधीचा विनियोग करत, केवळ कागदी घोडे न नाचवता प्रत्यक्ष कृतीतून महिला सक्षमीकरणाचा संदेश दिला आहे. यापूर्वीच जिल्ह्यातील सर्व महिला मदत कक्षांना संगणक संच आणि मोबाईल फोन यांसारखी आवश्यक साधने पुरविण्यात आली होती. आता या दुचाकींमुळे हे कक्ष अधिक गतिमान आणि कार्यक्षम बनले आहेत.
- प्रत्येक गावात, प्रत्येक पाड्यावर पोहोचणार ‘मदतीचा हात‘
या दुचाकींचा सर्वात मोठा फायदा जिल्ह्यातील अतिदुर्गम भाग, आदिवासी पाडे आणि खेडोपाड्यांतील महिलांना होणार आहे. आतापर्यंत मदतीसाठी पोलीस ठाणे गाठताना महिलांना अनेक अडचणी येत असत. मात्र आता एका फोनवर महिला पोलीस त्यांच्या दारात हजर होणार आहेत. शाळा-महाविद्यालये, महिलांची वसतिगृहे, कार्यालये आणि सार्वजनिक ठिकाणी महिलांची छेड काढणाऱ्या किंवा त्यांना त्रास देणाऱ्या टवाळखोरांवर या दुचाकीस्वार महिला पोलिसांची करडी नजर असणार आहे. कौटुंबिक हिंसाचाराच्या तक्रारींचीही अत्यंत वेगाने दखल घेतली जाणार आहे.
याप्रसंगी बोलताना पोलीस अधीक्षक श्री. बाळासाहेब पाटील म्हणाले, “महिला आणि बालकांवरील अत्याचार रोखणे हे आमचे परमकर्तव्य आहे. या दुचाकी केवळ वाहने नसून, त्या महिलांच्या मनात विश्वास आणि गुन्हेगारांच्या मनात भीती निर्माण करणारे प्रतीक आहेत. आमचा प्रत्येक महिला पोलीस कर्मचारी हा महिलांच्या समस्यांचे तातडीने निराकरण करण्यासाठी कटिबद्ध असेल.”
नाशिक ग्रामीण पोलीस दलाने सर्व महिलांना आवाहन केले आहे की, कोणत्याही प्रकारच्या अत्याचाराला बळी न पडता, तात्काळ पोलीस मदत कक्षाशी संपर्क साधावा. पोलीस दल तुमच्या संरक्षणासाठी सदैव तत्पर आहे. या उपक्रमामुळे नाशिक ग्रामीण पोलीस दलाने पुन्हा एकदा आपण जनतेचे मित्र आणि गुन्हेगारांचे कर्दनकाळ असल्याचे सिद्ध केले आहे.
