सराईत गुन्हेगाराची मुजोरी; उपनगर पोलिसांकडून आरोपींच्या मुसक्या आवळण्यासाठी शोधमोहीम तीव्र
नाशिकरोड, दि. १८ (विशेष प्रतिनिधी):शहरात गुन्हेगारांची दादागिरी किती वाढली आहे, याचा अंगावर काटा आणणारा प्रकार गुरुवारी रात्री नाशिकरोडच्या धोंगडे मळा परिसरात घडला. केवळ उधारीच्या पैशांच्या वादातून तीन गुंडांनी एका किराणा दुकानात घुसून दुकानदाराला बेदम मारहाण केली. इतक्यावरच न थांबता, त्यातील एका सराईत गुन्हेगाराने दुकानातील फरशी उचलून दुकानदाराच्या डोक्यात घालून त्यांना रक्तबंबाळ केले. या घटनेने परिसरात दहशतीचे वातावरण पसरले असून, घटनेची माहिती मिळताच उपनगर पोलिसांनी तात्काळ चक्रे फिरवत आरोपींच्या शोधासाठी पथके रवाना केली आहेत.
याप्रकरणी विजेंद्र हारीलाल यादव (वय ४५, रा. अक्वालाईन रेसिडेन्सी, धोंगडे मळा) यांनी उपनगर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, विजेंद्र यादव यांचे धोंगडे मळा परिसरात किराणा दुकान आहे. गुरुवारी, दि. १७ जुलै रोजी रात्री ९ वाजेच्या सुमारास ते दुकानात असताना आरोपी महावीर जैन, साजन मेहरोलिया आणि त्यांचा एक अज्ञात साथीदार दुकानात आले. त्यांनी यादव यांच्याकडे पूर्वीच्या उधारीच्या पैशांवरून वाद घालण्यास सुरुवात केली.
बोलता बोलता वाद विकोपाला गेला आणि आरोपींनी संगनमत करून यादव यांना शिवीगाळ करत दुकानातच लाथाबुक्क्यांनी अमानुष मारहाण करण्यास सुरुवात केली. हा सर्व प्रकार पाहून यादव प्रचंड घाबरले होते. मात्र, आरोपींचा क्रूरपणा इथेच थांबला नाही. संतापाच्या भरात आरोपी साजन मेहरोलिया याने दुकानात पडलेली एक फरशी उचलली आणि कोणताही विचार न करता ती थेट विजेंद्र यादव यांच्या डोक्यात घातली. या भ्याड हल्ल्यात यादव यांच्या डोक्याला गंभीर दुखापत झाली आणि ते रक्ताच्या थारोळ्यात कोसळले. आपला क्रूर हेतू साध्य होताच तिन्ही आरोपींनी घटनास्थळावरून पळ काढला.
- पोलिसांची तात्काळ कारवाई, वरिष्ठ अधिकाऱ्यांची घटनास्थळी धाव
घटनेची माहिती मिळताच उपनगर पोलीस ठाण्याचे वरिष्ठ पोलीस निरीक्षक जयवंत शिरसाठ, श्रेणी पोलीस उपनिरीक्षक गोसावी आणि तपासी अंमलदार सहाय्यक पोलीस उपनिरीक्षक जाधव यांनी रात्री दीड वाजता तात्काळ घटनास्थळी धाव घेतली. परिस्थितीचे गांभीर्य ओळखून वरिष्ठ पोलीस निरीक्षक शिरसाठ यांनी आरोपींना तातडीने अटक करण्याचे आदेश दिले. त्यांच्याच परवानगीने रात्री १ वाजून २ मिनिटांनी आरोपींविरुद्ध भारतीय न्याय संहिता कलम ११८(२), ११५(२), ३५२, ३३३ आणि ३(५) अन्वये गुन्हा दाखल करण्यात आला आहे.
- एक आरोपी सराईत गुन्हेगार, पोलिसांचा होता करडा पहारा
या हल्ल्यातील मुख्य आरोपी साजन मेहरोलिया हा पोलिसांच्या रेकॉर्डवरील सराईत गुन्हेगार असल्याचे तपासात उघड झाले आहे. त्याच्यावर उपनगर पोलीस ठाण्यात मारामारी, घरात घुसून मारहाण करणे, जीवघेणा हल्ला करणे असे तब्बल ६ गंभीर गुन्हे यापूर्वीच दाखल आहेत. पोलिसांच्या गुन्हेगारांवरील वचकाचा भाग म्हणून, उपनगर पोलिसांनी त्याच्यावर दोन वेळा प्रतिबंधात्मक कारवाई (सी.आर.पी.सी ११०) केली होती. इतकेच नव्हे, तर त्याला २०२२ साली हद्दपार देखील करण्यात आले होते. मात्र, हद्दपारीची मुदत संपताच त्याने पुन्हा डोके वर काढल्याचे या घटनेतून स्पष्ट झाले आहे.
या घटनेने सामान्य नागरिकांच्या सुरक्षेचा प्रश्न ऐरणीवर आला असला तरी, उपनगर पोलिसांच्या तत्परतेमुळे नागरिकांना मोठा दिलासा मिळाला आहे. “गुन्हेगार कोणीही असो, त्याची गय केली जाणार नाही. आरोपी फरार असले तरी त्यांना लवकरच शोधून काढून त्यांच्या मुसक्या आवळल्या जातील,” असा विश्वास वरिष्ठ पोलीस निरीक्षक जयवंत शिरसाठ यांनी व्यक्त केला आहे. सहाय्यक पोलीस उपनिरीक्षक जाधव या प्रकरणाचा अधिक तपास करत आहेत.
