गुप्त खबऱ्याच्या माहितीवरून पोलिसांनी रचला सापळा; अवैध कत्तलीचा मोठा डाव उधळला, शहरात खळबळ.
लाल 🚨 दिवा-नाशिक, दि. ५ ऑक्टोबर:शहर साखरझोपेत असताना पहाटेच्या अंधाराचा फायदा घेत कत्तलीच्या उद्देशाने आणलेल्या ५ मुक्या जनावरांना जीवदान देण्यात भद्रकाली पोलिसांना मोठे यश आले आहे. एका गुप्त माहितीच्या आधारे पोलिसांनी बागवानपुरा येथील एका मटणाच्या दुकानावर धाड टाकून दोन कसायांच्या मुसक्या आवळल्या आहेत. या धडाकेबाज कारवाईमुळे अवैध कत्तल करणाऱ्यांचे धाबे दणाणले असून, नाशिक पोलिसांच्या कामगिरीचे सर्वत्र कौतुक होत आहे.
सविस्तर वृत्त असे की, भद्रकाली पोलीस ठाण्याचे कर्तव्यदक्ष पोलीस अंमलदार सागर निकुंभ यांना त्यांच्या विश्वासू खबऱ्यामार्फत पहाटेच्या सुमारास बागवानपुरा येथील शाहआलम मटन दुकानात काही जनावरे बेकायदेशीरपणे कत्तलीसाठी आणली असल्याची पक्की माहिती मिळाली. माहितीची गंभीरता ओळखून निकुंभ यांनी तात्काळ ही बाब वरिष्ठ पोलीस निरीक्षक राकेश चौधरी आणि सहाय्यक पोलीस निरीक्षक सत्यवान पवार यांच्या कानावर घातली.
वरिष्ठांच्या आदेशाने क्षणाचाही विलंब न लावता, पोलीस हवालदार कयूम सय्यद, साळुंखे, अंमलदार निलेश विखे आणि योगेश माळी यांचे एक विशेष पथक तयार करण्यात आले. पहाटे ठीक ४:३० वाजता, पथकाने अत्यंत नियोजनबद्ध पद्धतीने कोंबडा वाडा परिसरातील नमूद ठिकाणी छापा टाकला. पोलिसांना पाहताच आरोपींची भंबेरी उडाली, मात्र सतर्क पोलिसांनी त्यांना पळून जाण्याची कोणतीही संधी दिली नाही.
घटनास्थळी १ गाय, १ बैल आणि ३ गोऱ्हे अत्यंत निर्दयीपणे कत्तलीच्या तयारीत बांधून ठेवलेले आढळून आले. पोलिसांनी तात्काळ गुलाम गौस इसाक कुरेशी (वय २३) आणि मोसिन रियाज शेख (वय ३६) या दोघांना ताब्यात घेतले. त्यांच्याकडे जनावरांविषयी चौकशी केली असता, त्यांच्याकडे कोणताही कायदेशीर परवाना किंवा कागदपत्रे आढळून आली नाहीत.
या प्रकरणी पोलीस अंमलदार सागर निकुंभ यांच्या फिर्यादीवरून भद्रकाली पोलीस ठाण्यात गुन्हा रजिस्टर नंबर ३४६/२०२५ अन्वये महाराष्ट्र पशू संरक्षण अधिनियम आणि प्राण्यांचा छळ प्रतिबंधक अधिनियमांतर्गत गुन्हा दाखल करण्यात आला आहे. दोन्ही आरोपींना अटक करण्यात आली असून, पुढील तपास पोलीस करत आहेत.
वरिष्ठ पोलीस निरीक्षक राकेश चौधरी यांच्या कुशल मार्गदर्शनाखाली भद्रकाली पोलिसांनी दाखवलेल्या या तत्परतेमुळे केवळ ५ मुक्या जीवांचे प्राण वाचले नाहीत, तर शहरात सुरू असलेल्या एका मोठ्या अवैध रॅकेटलाही चाप बसला आहे. या कौतुकास्पद कामगिरीबद्दल संपूर्ण पोलीस पथकाचे अभिनंदन केले जात आहे.
