अंमली पदार्थ विरोधी पथकाचा ‘सिंघम’ स्टाईल दणका; जळगाव कनेक्शन समोर!
लाल 🚨 दिवा-नाशिक, दि. ३:-नाशिक शहराला गुन्हेगारी आणि अवैध धंद्यांपासून मुक्त करण्याचा विडा उचललेले पोलीस आयुक्त श्री. संदीप कर्णिक यांच्या ‘झिरो टॉलरन्स’ धोरणाने आता रंग दाखवायला सुरुवात केली आहे. गुन्हे शाखेच्या अंमली पदार्थ विरोधी पथकाने एका अत्यंत धाडसी आणि थरारक कारवाईत, आलिशान स्कोडा गाडीतून होणारी तब्बल ८ लाख ७३ हजार ४४० रुपयांच्या विदेशी दारूची तस्करी उधळून लावली आहे. या कारवाईने नाशिकमधील अवैध दारू विक्रेत्यांच्या साम्राज्याला जोरदार हादरा बसला असून, जळगाव कनेक्शन उघड झाल्याने या रॅकेटचे धागेदोरे खोलवर रुजले असल्याची शक्यता वर्तवली जात आहे.
पोलीस आयुक्त श्री. संदीप कर्णिक यांच्या आदेशाने शहरात अवैध धंद्यांवर करडी नजर ठेवून असलेल्या अंमली पदार्थ विरोधी पथकाला एका अत्यंत विश्वासू खबऱ्याकडून माहिती मिळाली. “एक पांढरीशुभ्र स्कोडा रॅपिड गाडी (क्र. एम. एच. १५ GX ६८८२) दारूच्या महासागराने भरून आडगाव परिसरातून जाणार आहे,” ही टीप मिळताच वरिष्ठ पोलीस निरीक्षक सुशिला कोल्हे यांच्या नेतृत्वाखालील पथक विजेच्या वेगाने कामाला लागले. पोलीस उपआयुक्त (गुन्हे) श्री. किरणकुमार चव्हाण आणि सहायक पोलीस आयुक्त (गुन्हे) संदीप मिटके यांच्या मार्गदर्शनाखाली अत्यंत गोपनीय पद्धतीने सापळा रचण्यात आला. आडगाव येथील बळी महाराज मंदिराजवळील पार्कसाईड भागातील निर्जन मोकळ्या जागेवर पोलिसांनी आपले जाळे फेकले.
ठरलेल्या वेळी, संशयास्पद स्कोडा गाडी त्या निर्जनस्थळी दाखल होताच, दबा धरून बसलेल्या पोलीस पथकाने सिनेमाच्या दृश्यालाही लाजवेल अशा वेगाने गाडीला घेरले. काही कळायच्या आतच गाडीचा चालक, भारत अनिलकुमार कुकरेजा (वय ३४, रा. जळगाव, ह.मु. नाशिक), पोलिसांच्या ताब्यात होता. त्याच्या चेहऱ्यावरचे उडालेले रंगच सर्वकाही सांगून जात होते. जेव्हा पोलिसांनी गाडीची डिकी उघडली, तेव्हा आतले दृश्य पाहून तेही चक्रावून गेले. गाडीच्या आत महागड्या आणि नामांकित विदेशी ब्रँड्सच्या दारूचे बॉक्स खचाखच भरले होते. जणू काही ही गाडी नसून, एक चालतं-फिरतं ‘हाय-फाय बार’च होता!
जळगाव ते नाशिक: मोठ्या रॅकेटचा पर्दाफाश होण्याची शक्यता!
पोलिसांनी तात्काळ गाडीसह संपूर्ण पावणे नऊ लाखांचा मुद्देमाल जप्त केला. प्राथमिक चौकशीत आरोपी भारत कुकरेजा हा मूळचा जळगावचा असल्याचे समोर आले आहे. त्यामुळे जळगावमधून हा प्रचंड दारूसाठा नाशिकमध्ये कोणासाठी आणला जात होता? यामागे एखादे मोठे आंतरजिल्हा रॅकेट कार्यरत आहे का? नाशिकमधील कोणते ‘मोठे मासे’ या तस्करीच्या धंद्यात सामील आहेत? यांसारख्या अनेक प्रश्नांची उत्तरे शोधण्याचे आव्हान आता पोलिसांसमोर आहे. या एका कारवाईमुळे मोठ्या रॅकेटचा पर्दाफाश होण्याची दाट शक्यता निर्माण झाली आहे.
या धडाकेबाज कामगिरीबद्दल पोलीस आयुक्त श्री. संदीप कर्णिक यांनी संपूर्ण टीमचे अभिनंदन केले आहे. या मोहिमेत वपोनि सुशिला कोल्हे, सपोनि सचिन चौधरी, सपोनि विशाल पाटील यांच्यासह सपोउनि ताजणे, गायकर आणि अंमलदार डंबाळे, कोल्हे, सौंदाणे, नांद्रे, सानप, बागडे, वडजे, फुलपगारे व भड यांच्या धाडसाचे कौतुक होत आहे. आडगाव पोलीस ठाण्यात गुन्हा दाखल झाला असून, पोलीस आता या साखळीच्या मुळापर्यंत पोहोचण्यासाठी सज्ज झाले आहेत.
