पोलीस आयुक्त संदीप कर्णिक यांच्या आदेशानंतर गुन्हे शाखेची धडक कारवाई; नागरिकांमधून समाधानाचे वातावरण.
लाल 🚨 दिवा-नाशिक, दि. २ ऑक्टोबर:शहरातील कायदा आणि सुव्यवस्थेचा धाक निर्माण करत नाशिक शहर पोलिसांनी गुन्हेगारी आणि टवाळखोरी विरोधात आतापर्यंतची सर्वात मोठी आणि धडाकेबाज कारवाई केली आहे. पोलीस आयुक्त श्री. संदीप कर्णिक यांच्या ‘झिरो टॉलरन्स’ धोरणानुसार, गुन्हे शाखेच्या विविध पथकांनी इंदिरानगर परिसरात बुधवारी रात्री अचानक ‘कोम्बिंग ऑपरेशन’ राबवून तब्बल १०९ टवाळखोरांना ताब्यात घेतले. पोलिसांच्या या ‘सिंघम’ स्टाईल कारवाईमुळे गुन्हेगारी प्रवृत्तीच्या लोकांचे धाबे दणाणले असून, सामान्य नागरिकांनी सुटकेचा निःश्वास सोडला आहे.
गेल्या काही दिवसांपासून इंदिरानगर आणि परिसरात रस्त्यावर मद्यपान करणे, भरधाव वेगाने ट्रिपल सीट बाईक चालवणे, मोकळ्या मैदानांवर घोळक्याने बसून नागरिकांना त्रास देणे अशा घटना वाढल्या होत्या. या प्रकारांना आळा घालण्यासाठी आणि नागरिकांमध्ये सुरक्षिततेची भावना निर्माण करण्यासाठी पोलीस आयुक्त श्री. संदीप कर्णिक यांनी गुन्हे शाखेला विशेष सूचना दिल्या होत्या.
या आदेशाची तात्काळ अंमलबजावणी करत, पोलीस उप आयुक्त (गुन्हे) श्री. किरणकुमार चव्हाण आणि सहायक पोलीस आयुक्त श्री. संदिप मिटके व श्री. शेखर देशमुख यांच्या कुशल नेतृत्वाखाली एक महा-मोहीम आखण्यात आली. बुधवारी सायंकाळी ७ ते रात्री १० या वेळेत गुन्हे शाखेच्या तब्बल ८ विविध पथकांनी (मध्यवर्ती गुन्हे शाखा, युनिट-१, युनिट-२, गुंडा पथक, सायबर पोलीस, विशेष शाखा, अंमली पदार्थ विरोधी पथक आणि इंदिरानगर गुन्हे शोध पथक) संपूर्ण इंदिरानगर परिसर अक्षरशः पिंजून काढला. पोलिसांच्या गाड्यांचे सायरन वाजू लागताच टवाळखोरांची पळापळ झाली, मात्र चोख नियोजनामुळे कोणीही निसटू शकले नाही.
या धाडसी कारवाईत सार्वजनिक ठिकाणी दारू पिणारे, घोळक्याने उभे राहून दहशत निर्माण करणारे आणि वाहतुकीचे नियम मोडणारे एकूण १०९ संशयित पोलिसांच्या जाळ्यात अडकले. सर्वांना पोलीस स्टेशनला आणून त्यांची कसून चौकशी करण्यात आली आणि महाराष्ट्र पोलीस अधिनियमाच्या कलम ११२/११७ नुसार कडक कारवाई करण्यात आली.
पोलिसांचा इशारा: ‘पिक्चर अभी बाकी है!’
इंदिरानगरमधील ही कारवाई केवळ एक सुरुवात असून, नाशिक शहरातील प्रत्येक पोलीस स्टेशनच्या हद्दीत अशाच प्रकारची अचानक धाडसत्र राबवून टवाळखोरांवर वचक निर्माण केला जाईल, असा स्पष्ट इशारा पोलिसांनी दिला आहे.
पोलीस आयुक्त श्री. संदीप कर्णिक यांच्या दूरदृष्टीमुळे आणि गुन्हे शाखेच्या अधिकारी व अंमलदारांनी दाखवलेल्या तत्परतेमुळे ही कौतुकास्पद कामगिरी यशस्वी झाली. वपोनि/डॉ. अंचल मुदगल, वपोनि/तृप्ती सोनवणे, सपोनि/हेमंत तोडकर, सपोनि/चौधरी, पोउनि/गांगुर्डे आणि त्यांच्या पथकाने केलेल्या या कारवाईमुळे नागरिकांमध्ये सुरक्षिततेची भावना निर्माण झाली असून, पोलिसांच्या या धडक मोहिमेचे सर्वत्र कौतुक होत आहे.
