मोपेडस्वार जोडगोळीचा दिंडोरी रोडवर धुमाकूळ, तीन पादचाऱ्यांचे मोबाईल हिसकावले; पेठ रोडवरील वाईन शॉप फोडून ६५ हजारांचा मुद्देमाल लंपास, तर उच्चभ्रू वसाहतीतून सव्वा लाखाची पल्सर गायब.
लाल 🚨 दिवा-नाशिक, दि. २५: शहरात गुन्हेगारीने पुन्हा एकदा डोके वर काढले असून, म्हसरूळ पोलीस ठाण्याच्या हद्दीत अवघ्या २४ तासांच्या आत घडलेल्या गुन्ह्यांच्या सत्रामुळे नागरिकांमध्ये भीतीचे वातावरण पसरले आहे. एकाच रात्रीत मोबाईल हिसकावणाऱ्या टोळीने तीन ठिकाणी धुमाकूळ घातला, तर दुसरीकडे धाडसी घरफोडी करत चोरट्यांनी वाईन शॉपमधील महागड्या दारूसह लॅपटॉप आणि रोकड लंपास केली. इतकेच नव्हे, तर एका उच्चभ्रू वसाहतीतून सव्वा लाखांची पल्सर मोटारसायकलही चोरट्यांनी पळवून नेली. एकामागोमाग एक दाखल झालेल्या या चार गुन्ह्यांमुळे म्हसरूळ पोलिसांपुढे आरोपींना जेरबंद करण्याचे मोठे आव्हान उभे राहिले आहे.
थरार मोबाईल स्नॅचिंगचा: मोपेड टोळीची दहशत
मंगळवारी (दि. २३) सायंकाळपासून म्हसरूळ परिसरात मोपेडस्वार चोरट्यांनी अक्षरशः दहशत निर्माण केली. दिंडोरी रोडवर अवघ्या दीड तासाच्या फरकाने दोन घटना घडल्या. सायंकाळी ७ वाजता नायरा पेट्रोल पंपासमोर सोमनाथ बेंडकुळे (वय २३) हे फोनवर बोलत असताना पाठीमागून वेगात आलेल्या मोपेडवरील दोघांनी त्यांच्या हातातील १४ हजार रुपये किमतीचा विवो कंपनीचा मोबाईल हिसकावून पोबारा केला.
ही घटना ताजी असतानाच रात्री साडेआठच्या सुमारास दिंडोरी वाईन शॉपसमोर जेवणासाठी पायी निघालेले बाबुलाल शर्मा (वय २८) यांच्या हातातील २० हजार रुपये किमतीचा रियलमी कंपनीचा मोबाईल त्याच मोपेडस्वार जोडगोळीने हिसकावला. या दोन्ही घटनांनी दिंडोरी रोडवरील पादचाऱ्यांमध्ये घबराट पसरली. यानंतर रात्री आठच्या सुमारास कंसारामाता चौकात भाजीपाला घेण्यासाठी गेलेले संदीप गजभारे (वय ३६) हे देखील याच टोळीचे शिकार ठरले. त्यांच्या हातातील १० हजार रुपये किमतीचा ओप्पो मोबाईल चोरट्यांनी पलक झपकते ही पळवला. या तिन्ही घटनांमध्ये चोरट्यांची पद्धत सारखीच असल्याने ही एकच टोळी सक्रिय असल्याचा पोलिसांचा संशय आहे. याप्रकरणी पोहवा तुळशिराम जाधव आणि पोहवा वसावे अधिक तपास करत आहेत.
वाईन शॉपवर धाडसी डल्ला: ६५ हजारांचा ऐवज लंपास
एकीकडे मोबाईल स्नॅचिंग सुरू असताना, दुसरीकडे मध्यरात्री पेठ रोडवरील ‘संतोष बिअर अँड वाईन शॉपी’ चोरट्यांनी लक्ष्य केली. रात्री २ ते पहाटे ४ च्या सुमारास दोन अज्ञात चोरट्यांनी दुकानाचे शटर उचकावून कुलुपे तोडली आणि आत प्रवेश केला. चोरट्यांनी दुकानातील महागड्या विदेशी मद्याच्या बाटल्या, ज्यामध्ये कंगारू बिअर, करोना बिअर आणि यॉर्क कंपनीची शॅम्पेन यांचा समावेश होता, त्या चोरून नेल्या. यासोबतच ४८ हजार रुपये किमतीचा डेल कंपनीचा लॅपटॉप आणि गल्ल्यातील २ हजार रुपयांची रोकड असा एकूण ६४,९०० रुपयांचा मुद्देमाल घेऊन चोरटे पसार झाले. सकाळी दुकानमालक योगेश चव्हाण यांच्या ही बाब लक्षात येताच त्यांनी तात्काळ म्हसरूळ पोलीस ठाण्यात धाव घेतली. या धाडसी घरफोडीमुळे परिसरातील व्यापाऱ्यांमध्ये भीतीचे वातावरण आहे. या गुन्ह्याचा तपास पोहवा पी.आर. सोनवणे करत आहेत.
उच्चभ्रू वसाहतीतून पल्सर लंपास
चोरट्यांचे सत्र इथेच थांबले नाही. म्हसरूळच्या किशोर सूर्यवंशी मार्गावरील ‘चाणक्य सोसायटी’ सारख्या उच्चभ्रू वसाहतीतून चोरट्यांनी एक मोटारसायकल चोरून नेली. अभिजित शिंदे (वय ३४) यांनी आपली एमएच १५ एफपी २५४३ क्रमांकाची, १ लाख २५ हजार रुपये किमतीची बजाज पल्सर २२० मोटारसायकल सोसायटीच्या पार्किंगमध्ये हँडल लॉक करून उभी केली होती. रात्रीच्या अंधाराचा फायदा घेत अज्ञात चोरट्याने ही मोटारसायकल चोरून नेली. सकाळी शिंदे यांना आपली गाडी जागेवर न दिसल्याने त्यांनी तात्काळ पोलिसांत तक्रार दाखल केली. या घटनेमुळे रहिवाशी सोसायट्यांमधील वाहनेही सुरक्षित नसल्याचे स्पष्ट झाले आहे. याप्रकरणी पोहवा कविश्वर खराटे तपास करत आहेत.
वरिष्ठ पोलीस निरीक्षक अंकुश चिंतामण यांच्या मार्गदर्शनाखाली म्हसरूळ पोलीस या सर्व गुन्ह्यांचा समांतर तपास करत आहेत. एकाच रात्रीत वेगवेगळ्या टोळ्यांनी घातलेला धुमाकूळ पाहता पोलिसांच्या रात्रगस्तीवर प्रश्नचिन्ह निर्माण झाले असून, या चोरट्यांना लवकरात लवकर अटक करण्याची मागणी नागरिकांकडून जोर धरू लागली आहे.
