लाल 🚨 दिवा-नाशिक,दि.१४:- – धक्कादायक घटना! खुनाच्या उद्देशाने अपहरण झालेल्या एका इसमाची नाशिक पोलिसांनी केवळ १० तासांत सुटका केली आहे. आरोपीला जेरबंद करण्यात पोलिसांना यश आले आहे. ही घटना १२ सप्टेंबर २०२५ रोजी घडली. रात्री ८ वाजता एका महिलेने नाशिकच्या वरिष्ठ पोलीस निरीक्षक विश्वास पाटील यांना धाव घेत आपल्या पतीचे अपहरण झाल्याची माहिती दिली. तिच्या म्हणण्यानुसार, तिच्या नंदोईने जीवे मारण्याच्या उद्देशाने तिच्या पतीचे अपहरण केले होते.
गंभीरतेची जाणीव ठेवून पोलीस निरीक्षक पाटील यांनी तातडीने वरिष्ठांना माहिती दिली. पोलीस उपायुक्त आणि सहाय्यक पोलीस आयुक्तांच्या आदेशानुसार दोन पथके तयार करण्यात आली. एक पथक नाशिकमध्ये सीसीटीव्ही फुटेज तपासण्यासाठी रवाना झाले, तर दुसरे पथक आरोपीच्या मूळ गावी जालना येथे पाठवण्यात आले.
दरम्यान, आरोपीने अपहृत इसमाच्या पत्नीला फोन करून धमकी दिली की तो तिच्या पतीला मारून टाकेल. त्यानंतर त्याने फोन बंद केला. आरोपीचा शेवटचा फोन वैजापूरजवळील लासूर स्टेशन येथून झाल्याचे पोलिसांना आढळले. जालन्यातील पथकाला ही माहिती देण्यात आली आणि त्यांनी स्थानिक पोलिसांच्या मदतीने नाकाबंदी केली.
पोलीस उपनिरीक्षक मुक्तेश्वर लाड, पोलीस अंमलदार श्रीहरी बिराजदार आणि जितेंद्र शिंदे यांच्या पथकाला स्थानिक बातमीदाराकडून माहिती मिळाली की आरोपी हा अपहृत इसमाला घेऊन श्रीराम तांडा येथे येत आहे. पोलिसांनी सापळा रचला आणि आरोपीला पकडण्यात यश मिळवले. मात्र, इतर दोन साथीदार पळून जाण्यात यशस्वी झाले. कपाशीच्या शेतातून दोन किलोमीटर पाठलाग करून पोलिसांनी मुख्य आरोपी संदीप भिमराव चव्हाणला अटक केली.
आरोपी हा अपहृत इसमाचा मेहुणा असल्याचे निष्पन्न झाले आहे. त्याने आपल्या मेहुण्याच्या पत्नीशी प्रेमविवाह केला होता. याचा राग मनात धरून त्याने हे अपहरण केले होते. पोलिसांच्या तत्परतेमुळे एका जीव वाचला आहे. या कामगिरीबद्दल पोलीस आयुक्त संदिप कणिक, पोलीस उपायुक्त किशोर काळे, सहाय्यक पोलीस आयुक्त शेखर देशमुख आणि पोलीस निरीक्षक विश्वास पाटील यांच्यासह सर्व पोलीस पथकाचे कौतुक होत आहे.
