प्रेमाच्या आड येणाऱ्या पतीचा प्रियकराच्या मदतीने काढला काटा; इंदिरानगर पोलिसांनी कटकारस्थानाचा केला पर्दाफाश, मारेकरी पत्नीला ठोकल्या बेड्या!
लाल 🚨 दिवा-नाशिक,दि.१३:-नाशिक,“थोड्या वेळात येतो,” असे सांगून घरातून बाहेर गेलेल्या संतोष काळेच्या हत्येचे गूढ उकलण्यात इंदिरानगर पोलिसांना २४ तासांच्या आत यश आले आहे. या थरारक हत्याकांडाची सूत्रधार दुसरी तिसरी कोणी नसून, मृत संतोषची पत्नीच असल्याचे उघड झाल्याने संपूर्ण नाशिक शहर हादरले आहे. अनैतिक संबंधात अडथळा ठरणाऱ्या पतीला प्रियकर आणि त्याच्या साथीदारांच्या मदतीने दगडाने ठेचून संपवल्याची कबुली तिने दिली आहे. इंदिरानगर पोलिसांच्या या वेगवान आणि कौशल्यापूर्ण तपासामुळे गुन्हेगारांचे धाबे दणाणले आहेत.
काय आहे नेमकी घटना?
काल रात्री संतोष उर्फ छोटू काळे (वय ३७) हा बेपत्ता झाल्याची तक्रार त्याचे वडील अशोक काळे यांनी इंदिरानगर पोलीस ठाण्यात दिली होती. घटनेचे गांभीर्य ओळखून वरिष्ठ पोलीस निरीक्षक तृप्ती सोनवणे यांच्या मार्गदर्शनाखाली तपासी अंमलदार सपोनि. चौधरी आणि त्यांच्या पथकाने तात्काळ तपासाची चक्रे फिरवली. शोधमोहिमेदरम्यान गरवारे बस स्टॉपच्या मागे संतोषचा रक्ताच्या थारोळ्यात पडलेला मृतदेह आढळून आला. घटनास्थळाचे भीषण दृश्य पाहून पोलिसांनाही धक्का बसला.
पोलिसांच्या नजरेतून काहीच सुटले नाही!
वरवर पाहता हा खून अज्ञात इसमांनी केल्याचा वाटत असला, तरी इंदिरानगर पोलिसांच्या अनुभवी नजरेतून या प्रकरणातील धागेदोरे सुटले नाहीत. पोलिसांनी तांत्रिक विश्लेषण आणि गोपनीय खबऱ्यांकडून मिळालेल्या माहितीच्या आधारे तपास सुरू केला. कुटुंबीयांची चौकशी करत असताना मृत संतोषची पत्नी पार्वती काळे हिच्या वागण्यात आणि बोलण्यात पोलिसांना विसंगती आढळली. तिचा पती बेपत्ता आणि नंतर मृत झाल्याचे कळूनही तिच्या चेहऱ्यावर दुःखाचा लवलेशही दिसत नव्हता. पोलिसांचा संशय बळावला आणि त्यांनी पार्वतीला ताब्यात घेऊन पोलिसी खाक्या दाखवला. सुरुवातीला उडवाउडवीची उत्तरे देणाऱ्या पार्वतीने अखेर अवघ्या काही तासांतच तोंड उघडले आणि हत्येचा संपूर्ण कटच पोलिसांसमोर कथन केला.
असा रचला हत्येचा कट!
पार्वतीचे अहिल्यानगर येथील प्रफुल्ल कांबळे याच्यासोबत अनैतिक संबंध होते. या संबंधांची कुणकुण तिचा पती संतोषला लागली होती, ज्यामुळे त्यांच्यात सतत वाद होत होते. अखेर, प्रेमाच्या आड येणाऱ्या पतीचा काटा काढण्याचा निर्णय तिने प्रियकर प्रफुल्लसोबत मिळून घेतला. योजनेनुसार, काल रात्री संतोषला एका बहाण्याने घराबाहेर बोलावण्यात आले. त्यानंतर प्रफुल्ल आणि त्याच्या दोन अनोळखी साथीदारांनी संतोषला गरवारे बस स्टॉपमागील मोकळ्या जागेत नेऊन दगडाने ठेचून त्याची निर्घृण हत्या केली.
इंदिरानगर पोलिसांची धडक कारवाई !
याप्रकरणी, मृत संतोषचे वडील अशोक काळे यांच्या फिर्यादीवरून पत्नी पार्वती काळे, तिचा प्रियकर प्रफुल्ल कांबळे आणि दोन अनोळखी इसमांविरुद्ध भारतीय न्याय संहिता कलम १०३(१) आणि ६१(२) अन्वये खुनाचा गुन्हा दाखल करण्यात आला आहे. पोलिसांनी मुख्य सूत्रधार असलेल्या पार्वती काळे हिला अटक केली असून, फरार प्रियकर प्रफुल्ल आणि त्याच्या साथीदारांच्या मुसक्या आवळण्यासाठी पोलिसांची विशेष पथके रवाना झाली आहेत.
इंदिरानगर पोलिसांच्या या वेगवान कामगिरीमुळे एका क्लिष्ट गुन्ह्याचा अवघ्या काही तासांत छडा लागला असून, त्यांच्या या कामगिरीचे सर्वत्र कौतुक होत आहे
