अतिवृष्टीने खचू नका, सरकार तुमच्या पाठीशी! सरिता नरकेंनी वाढवली ई-पीक पाहणीची मुदत.
लाल 🚨 दिवा -आमच्या विशेष प्रतिनिधीकडून पुणे, दि. १३ सप्टेंबर: राज्यात झालेल्या अतिवृष्टी आणि दुबार पेरणीच्या संकटामुळे ई-पीक पाहणी करू न शकलेल्या लाखो शेतकऱ्यांसाठी राज्य शासनाने आज एक अत्यंत महत्त्वपूर्ण आणि दिलासादायक निर्णय घेतला आहे. खरीप हंगाम २०२५ करिता ई-पीक पाहणी नोंदणीसाठी आता
२० सप्टेंबर २०२५ पर्यंत मुदतवाढ देण्यात आली आहे. सरकारच्या या निर्णयामुळे पीक नोंदणीपासून वंचित राहण्याची भीती असलेल्या शेतकऱ्यांच्या चेहऱ्यावर हसू उमटले असून, त्यांचे मोठे संकट टळले आहे.
राज्याच्या अनेक भागांना यावर्षी अतिवृष्टीच्या मोठ्या संकटाला सामोरे जावे लागले. अनेक ठिकाणी शेतकऱ्यांवर दुबार पेरणीची वेळ आली. शेतातील नुकसानीचा आढावा घेणे आणि शेतीची कामे पुन्हा मार्गी लावण्याच्या धावपळीत अनेक शेतकऱ्यांना शासनाच्या ‘ई-पीक पाहणी’ मोबाईल ॲपद्वारे आपल्या पिकांची नोंदणी करणे शक्य झाले नव्हते. मूळ वेळापत्रकानुसार १४ सप्टेंबर ही अंतिम मुदत असल्याने, लाखो शेतकरी शासकीय योजना, पीक विमा आणि नुकसान भरपाईपासून वंचित राहण्याची दाट शक्यता निर्माण झाली होती.
या गंभीर परिस्थितीची दखल घेत, जमाबंदी आयुक्त आणि संचालक भूमी अभिलेख कार्यालयाने तातडीने पावले उचलली. शेतकऱ्यांचे हित जपण्यासाठी आणि एकही शेतकरी या प्रक्रियेतून सुटू नये, या उदात्त हेतूने पीक पाहणी नोंदणीसाठी सहा दिवसांची सरळ मुदतवाढ जाहीर केली आहे.
महसूल माहिती तंत्रज्ञान कक्षाच्या राज्य संचालक तथा अपर जिल्हाधिकारी, सरिता तरके यांनी स्वाक्षरी केलेल्या परिपत्रकानुसार, शेतकऱ्यांना आता २० सप्टेंबरपर्यंत स्वतःच्या मोबाईलवरून पिकांची नोंदणी करता येणार आहे. यानंतरही जे शेतकरी नोंदणी करू शकणार नाहीत, त्यांच्यासाठी २१ सप्टेंबर ते ४ नोव्हेंबर २०२५ या कालावधीत तलाठी आणि कृषी सहायक यांच्यामार्फत ई-पीक पाहणी पूर्ण केली जाईल, असेही शासनाने स्पष्ट केले आहे.
या निर्णयामुळे शेतकऱ्यांना केवळ पीक नोंदणीसाठी अतिरिक्त वेळच मिळाला नाही, तर नैसर्गिक आपत्तीच्या काळात शासन आपल्या पाठीशी खंबीरपणे उभे आहे, हा विश्वासही मिळाला आहे. या निर्णयाचे राज्यातील शेतकरी वर्गातून मोठ्या प्रमाणावर स्वागत होत आहे.
