भव्य जुलूस, ठिकठिकाणी अन्नदान; सर्वधर्म समभावाचे अनोखे दर्शन
लाल 🚨 दिव-नाशिक, दि.६:-प्रतिनिधी:इस्लाम धर्माचे प्रेषित मोहम्मद पैगंबर यांच्या १५०० व्या जयंतीनिमित्त साजरा होणाऱ्या ईद-ए-मिलादच्या पर्वावर संपूर्ण नाशिक शहर आज अक्षरशः भक्तीरसात न्हाऊन निघाले. ‘सरकार की आमद, मरहबा’च्या घोषणांनी आसमंत दुमदुमून गेला होता, तर दुसरीकडे सामाजिक सलोख्याचे दर्शन घडवत विविध मंडळांनी आयोजित केलेल्या अन्नदानाच्या कार्यक्रमांनी शहरात मानवतेचा सुगंध पसरवला होता. सकाळपासूनच शहरात एक वेगळाच उत्साह आणि चैतन्याचे वातावरण अनुभवायला मिळत होते.
उर्दू महिन्याच्या १२ तारखेला येणाऱ्या या पवित्र दिनानिमित्त नाशिक शहरात जय्यत तयारी करण्यात आली होती. ठिकठिकाणी उभारलेल्या आकर्षक कमानी, रोषणाईने झगमगणारे मंच आणि त्यावर लावलेली पैगंबरांच्या शिकवणुकीची माहिती देणारी पोस्टर्स यामुळे संपूर्ण परिसर मंगलमय झाला होता. या उत्सवाचा केंद्रबिंदू ठरली ती नाशिकरोड परिसरातून निघालेली भव्य जुलूस मिरवणूक.
नाशिकरोडच्या गोसावी वाडी येथून सकाळी ठीक ११ वाजता हजारो समाजबांधवांच्या उपस्थितीत या नेत्रदीपक जुलूसला प्रारंभ झाला. परिसरातील सर्व लहान-मोठी मंडळे यात एकदिलाने सहभागी झाली होती. डॉक्टर बाबासाहेब आंबेडकर रोड, बिटको चौक, देवळालीगाव मार्गे विहितगाव सर्कलला फेरी मारून ही मिरवणूक देवळाली गावातील गाडेकर मळा येथे पोहोचली. शिस्तबद्ध पद्धतीने आणि पैगंबरांचा जयघोष करत निघालेली ही मिरवणूक सर्वांचे लक्ष वेधून घेत होती.
गाडेकर मळा येथील जॉगिंग ट्रॅक मैदानावर मिरवणुकीची सांगता झाल्यानंतर धर्मगुरू मौलाना अब्दुल बारी यांचे प्रेरणादायी प्रवचन झाले. त्यांनी आपल्या भाषणातून मोहम्मद पैगंबरांनी दिलेल्या शांती, प्रेम आणि मानवतेच्या संदेशाचे महत्त्व पटवून दिले. “इस्लाम हा नेहमीच शांतता आणि बंधुभावाची शिकवण देतो,” असे ते म्हणाले.
प्रवचनानंतर अंजुमन-ए-मोहम्मदिया सोशल ग्रुपने आपल्या परंपरेनुसार भव्य ‘आमदावत’ अर्थात अन्नदानाचा कार्यक्रम आयोजित केला होता. या ठिकाणी जात-धर्म-पंथ विसरून हजारो नागरिकांनी एकत्र भोजनाचा आस्वाद घेतला. हा क्षण म्हणजे नाशिकच्या सर्वधर्म समभावाच्या परंपरेचे प्रतीकच ठरला.
या कार्यक्रमाला उपनगर पोलीस ठाण्याचे वरिष्ठ पोलीस निरीक्षक जयंत शिरसाट आणि नाशिकरोड पोलीस ठाण्याचे वरिष्ठ पोलीस निरीक्षक जितेंद्र सपकाळे यांनी जातीने हजर राहून चोख बंदोबस्त ठेवला. तसेच माजी नगरसेवक भैय्या अस्लम मणियार, सूर्यकांत लवटे, योगेश गाडेकर, सागर निकाळे, कुमार पगारे, सुधाकर जाधव, श्याम गोवाड यांसारख्या सर्वपक्षीय नेत्यांनी आणि सामाजिक कार्यकर्त्यांनी उपस्थिती लावून सामाजिक सलोख्याचा संदेश दिला. समाजबांधव निजाम मास्टर, हमीद दादा, जुम्मा खान यांच्यासह अंजुमन-ए-मोहम्मदिया सुन्नी अरबीया सोशल ग्रुपचे सर्व पदाधिकारी आणि कार्यकर्ते कार्यक्रमाच्या यशस्वीतेसाठी अहोरात्र झटत होते.
एकंदरीत, संपूर्ण शहरात शांततेत आणि मोठ्या उत्साहात पार पडलेल्या या सोहळ्याने नाशिकच्या सामाजिक सलोख्याच्या परंपरेत आणखी एक मानाचा तुरा रोवला आहे.
