ठक्कर बाजार परिसरात रक्ताचा सडा, विकृतीचा कळस! क्रूर कृत्यानंतर पळून जाण्याच्या तयारीत असतानाच पोलिसांनी काही तासांत आवळल्या मुसक्या; शहरात खळबळ.
लाल 🚨 दिवा -नाशिक, दि.२:-प्रतिनिधीकडून:शहराचे हृदयस्थान असलेल्या आणि २४ तास वर्दळीने गजबजलेल्या ठक्कर बाजार परिसरात आज माणुसकीला हादरवून सोडणारी एक थरारक घटना घडली. मैत्रिणीची छेड काढल्याच्या क्षुल्लक कारणावरून संतापलेल्या तीन अल्पवयीन मुलांनी एका तरुणाच्या डोक्यात सिमेंटचा पेव्हर ब्लॉक घालून त्याचा निर्घृणपणे खून केला. दिवसाढवळ्या घडलेल्या या घटनेने संपूर्ण नाशिक शहर सुन्न झाले आहे. मात्र, नाशिक शहर गुन्हे शाखेच्या युनिट १ ने दाखवलेल्या तत्परतेमुळे, या सैतानी कृत्यानंतर पळून गेलेल्या तिन्ही विधीसंघर्षित बालकांना काही मिनिटातच शिताफीने जेरबंद करण्यात आले आहे. चक्क पोलीस पथक जेवण सोडून घटनास्थळी रवाना…
काय घडले नेमके? रक्ताने माखलेला तो थरार…
आज, दिनांक ०२/०९/२०२५ रोजी दुपारच्या सुमारास, ठक्कर बाजार बस स्थानकात प्रवेश करणाऱ्या रस्त्याच्या डाव्या बाजूच्या फुटपाथवर हा रक्तरंजित थरार घडला. मिळालेल्या माहितीनुसार, मृत तरुण आणि या अल्पवयीन मुलांमध्ये त्यांच्यासोबत असलेल्या एका मैत्रिणीच्या छेडछाडीवरून वाद सुरू झाला. शाब्दिक बाचाबाचीचे रूपांतर पाहता पाहता जीवघेण्या हल्ल्यात झाले. रागाच्या भरात या १५-१६ वर्षे वयोगटातील मुलांनी कोणताही मागचा-पुढचा विचार न करता, जवळच पडलेला सिमेंटचा पेव्हर ब्लॉक उचलला आणि त्या तरुणाच्या डोक्यावर घातला. एकापाठोपाठ एक केलेल्या वर्मी घावांमुळे तो तरुण रक्ताच्या थारोळ्यात जागीच कोसळला आणि त्याचा तडफडून मृत्यू झाला. क्रूरतेचा कळस म्हणजे, हे कृत्य केल्यानंतर त्यांच्या चेहऱ्यावर पश्चात्तापाचा लवलेशही नव्हता. आजूबाजूला जमलेल्या लोकांच्या आणि वाहतुकीच्या गोंधळातून वाट काढत त्यांनी घटनास्थळावरून धूम ठोकली.
पोलिसांची चित्तथरारक कारवाई आणि आरोपी जेरबंद
घटनेची माहिती मिळताच सरकारवाडा पोलीस ठाण्यात गुन्हा (गुरनं २३९/२०२५) दाखल करण्यात आला. घटनेचे गांभीर्य ओळखून पोलीस आयुक्त श्री. संदिप कर्णिक, पोलीस उपायुक्त (गुन्हे) श्री. किरणकुमार चव्हाण आणि सहाय्यक पोलीस आयुक्त श्री. संदिप मिटके यांनी आरोपींना तात्काळ अटक करण्याचे आदेश दिले.
या आदेशानुसार, गुन्हे शाखा युनिट १ चे वरिष्ठ पोलीस निरीक्षक श्री. मधुकर कड यांच्या मार्गदर्शनाखाली एक विशेष पथक तातडीने कामाला लागले. पथकाने घटनास्थळी भेट देऊन तपासाची चक्रे वेगाने फिरवली. यावेळी पोलीस उपनिरीक्षक चेतन श्रीवंत यांना एका गुप्त बातमीदारामार्फत पक्की खबर मिळाली की, गुन्हा करणारे मारेकरी मेळा बसस्थानकाच्या दिशेने पळून गेले आहेत. क्षणाचाही विलंब न लावता, पोउनि/चेतन श्रीवंत, सुदाम सांगळे यांच्यासह प्रवीण वाघमारे, प्रशांत मरकड, संदिप भांड आणि इतर सहकाऱ्यांच्या पथकाने मेळा बसस्थानक परिसर पिंजून काढण्यास सुरुवात केली. पोलिसांची गाडी पाहताच, तीन मुले घाबरून पळू लागली. त्यांच्या संशयास्पद हालचालींमुळे पोलिसांनी त्यांचा पाठलाग करून त्यांना शिताफीने ताब्यात घेतले.
थरकाप उडवणारी कबुली
पोलिसी खाक्या दाखवताच या मुलांनी आपला गुन्हा कबूल केला. “त्याने आमच्या मैत्रिणीची छेड काढली होती, म्हणून आम्ही त्याला संपवले,” अशी थरकाप उडवणारी कबुली त्यांनी दिली. या तिन्ही विधीसंघर्षित बालकांना पुढील कारवाईसाठी सरकारवाडा पोलीस ठाण्याच्या ताब्यात देण्यात आले आहे.
यशस्वी कामगिरी
ही कौतुकास्पद कामगिरी पोलीस आयुक्त श्री. संदिप कर्णिक, पोलीस उप-आयुक्त श्री. किरणकुमार चव्हाण, सहा. पोलीस आयुक्त श्री. संदिप मिटके यांच्या मार्गदर्शनाखाली वरिष्ठ पोलीस निरीक्षक श्री. मधुकर कड आणि गुन्हे शाखा युनिट १ च्या संपूर्ण टीमने केली आहे. त्यांच्या या तत्परतेमुळे शहरातील गुन्हेगारांवर वचक निर्माण होण्यास मदत झाली आहे, मात्र अल्पवयीन मुलांमधील वाढती गुन्हेगारी आणि टोकाची हिंसक वृत्ती हा समाजासाठी एक गंभीर चिंतेचा विषय बनला आहे.
