शहरातील दुसरी मोठी कारवाई: १० घरफोड्यांचा छडा लावत १३ लाखांचा मुद्देमाल जप्त.
लाल 🚨 दिवा -नाशिक, दि. २:- (आमच्या प्रतिनिधीकडून):पंचवटी आणि म्हसरूळ परिसरात गेल्या काही दिवसांपासून घरफोड्यांचे सत्र सुरू करून नागरिकांची झोप उडवणाऱ्या एका सराईत गुन्हेगाराच्या मुसक्या आवळण्यात पंचवटी पोलिसांच्या गुन्हे शोध पथकाला मोठे यश आले आहे. विशेष म्हणजे, सामाजिक उत्तरदायित्व निधीतून (CSR) शहरात लावण्यात आलेल्या सीसीटीव्ही कॅमेऱ्यांच्या मदतीने उलगडलेला हा दुसरा मोठा गुन्हा ठरला आहे. सलग तीन ते चार दिवस रात्रीच्या वेळी सापळा रचून पोलिसांनी फारूक रज्जाक काकर (वय ४८, रा. लोहारी बुद्रुक, जि. जळगाव) याला शिताफीने जेरबंद केले. त्याच्याकडून तब्बल ११ तोळे सोने, १ किलो ५२ ग्रॅम चांदी आणि घरफोडीचे साहित्य असा एकूण १३ लाख ०६ हजार ७५४ रुपयांचा मुद्देमाल हस्तगत करण्यात आला आहे.
दिनांक २३ ऑगस्ट रोजी पंचवटीतील राधानगर येथील कल्पेश पार्कमध्ये एक मोठी घरफोडी झाली होती. या घटनेने परिसरात भीतीचे वातावरण पसरले होते. शहरात वाढत्या घरफोड्यांची गंभीर दखल घेत पोलीस आयुक्त श्री. संदीप कर्णिक, पोलीस उपआयुक्त श्रीमती. मोनिका राऊत, आणि सहाय्यक पोलीस आयुक्त श्रीमती संगिता निकम यांनी आरोपींना तात्काळ अटक करण्याचे आदेश दिले होते.
वरिष्ठ पोलीस निरीक्षक गजेंद्र पाटील यांच्या मार्गदर्शनाखाली गुन्हे शोध पथकाचे सहाय्यक पोलीस निरीक्षक सतीश शिरसाठ यांनी तपासाची चक्रे वेगाने फिरवली. पथकाने परिसरातील सर्व घरफोड्यांच्या ठिकाणचे सीसीटीव्ही फुटेज बारकाईने तपासले. **यामध्ये सीएसआर निधीतून लावण्यात आलेल्या उच्च क्षमतेच्या कॅमेऱ्यांनी महत्त्वाची भूमिका बजावली.** या कॅमेऱ्यांमधील स्पष्ट चित्रणामुळे आरोपीची हालचाल, येण्या-जाण्याचे मार्ग आणि गुन्हा करण्याची पद्धत (modus operandi) समजण्यास मोठी मदत झाली. यापूर्वीही एका मोठ्या गुन्ह्याची उकल याच कॅमेऱ्यांच्या मदतीने झाली होती, त्यामुळे या उपक्रमाचे यश पुन्हा एकदा सिद्ध झाले आहे.
मिळालेल्या माहितीच्या आधारे सपोनि शिरसाठ यांनी दोन विशेष पथके तयार केली. एक पथक मखमलाबाद रोड, ड्रिम कॅसल परिसरात तर दुसरे पथक औदुंबर नगर, अमृतधाम परिसरात सलग ३-४ दिवस रात्री ११ ते पहाटे ४ वाजेपर्यंत दबा धरून बसले होते. अखेर २६ ऑगस्ट रोजी रात्री साडेअकराच्या सुमारास सीसीटीव्हीमध्ये दिसणाऱ्या वर्णनाचा एक संशयित इसम पोलिसांच्या नजरेस पडला. क्षणाचाही विलंब न लावता पोहवा कैलास शिंदे, अमोल काळे, पोशि सचिन बाहिकर, वैभव परदेशी, अंकुश काळे आणि नितीन पवार यांच्या पथकाने अत्यंत चालाखीने त्याला ताब्यात घेतले.
चौकशीत उघड झाले गुन्ह्यांचे सत्र!
पोलिसी खाक्या दाखवताच आरोपी फारूक काकरने पोपटासारखे बोलायला सुरुवात केली. त्याच्या अंगझडतीत घरफोडीसाठी लागणारी कटावणी, पक्कड आणि काही चोरलेला माल सापडला. अधिक चौकशी केली असता त्याने पंचवटी पोलीस ठाणे हद्दीतील ८ आणि म्हसरूळ पोलीस ठाणे हद्दीतील २ अशा एकूण १० घरफोड्या केल्याची कबुली दिली. यापूर्वी त्याच्यावर अंबड पोलीस ठाण्यातही दोन गुन्हे दाखल असल्याची माहिती समोर आली आहे.
ही कौतुकास्पद कामगिरी पोलीस आयुक्त श्री. संदीप कर्णिक यांच्या मार्गदर्शनाखाली पंचवटी गुन्हे शोध पथकाचे सपोनि सतीश शिरसाठ, सपोउनि संपत जाधव, पोहवा कैलास शिंदे, अमोल काळे, महेश नांदुर्डीकर, पोना जयवंत लोणारे आणि त्यांच्या संपूर्ण टीमने यशस्वीरित्या पार पाडली आहे. या धाडसी कारवाईमुळे नागरिकांनी सुटकेचा निःश्वास सोडला असून, पोलीस पथकाचे सर्वत्र कौतुक होत आहे. गुन्ह्याचा पुढील तपास पोहवा अमोल काळे करत आहेत.
