नाशिक शहर गुन्हे शाखा युनिट-१ ची २४ तासांत धडाकेबाज कारवाई; गुप्त खबऱ्यांचे जाळे ठरले निर्णायक!
लाल 🚨 दिवा-नाशिक, दि.१:-प्रतिनिधी:शहराला हादरवून सोडणाऱ्या नांदुरनाका येथील राहुल धोत्रे हत्याकांड प्रकरणी नाशिक शहर गुन्हे शाखा युनिट क्रमांक १ च्या पथकाने २४ तासांच्या आत दोन प्रमुख आरोपींच्या मुसक्या आवळून गुन्हेगारी विश्वाला सणसणीत चपराक लगावली आहे. किरकोळ वादातून सुरू झालेला हा थरार रक्ताच्या थारोळ्यात संपला होता. यानंतर फरार झालेल्या मारेकऱ्यांना शोधून काढण्यासाठी पोलिसांनी गुप्त खबऱ्यांचे जाळे आणि अथक परिश्रमांची जोड देत ही नेत्रदीपक कामगिरी केली आहे.
असा घडला होता रक्ताचा खेळ
दिनांक २२ ऑगस्ट रोजी सायंकाळी ६ वाजेच्या सुमारास नांदुरनाक्यावरील दिंडे मळा परिसरात एका क्षुल्लक वादाची ठिणगी पडली. फिर्यादीचा भाऊ सनी धोत्रे याचा आरोपींशी वाद झाला. पण या वादाचे रूपांतर सूडाच्या भावनेत झाले. आरोपींनी सनीचा भाऊ राहुल संजय धोत्रे आणि त्याचा आतेभाऊ अजय कुसाळकर यांचा पाठलाग सुरू केला. हा पाठलाग एखाद्या चित्रपटातील दृश्याप्रमाणे थरारक होता. अखेर, आरोपी सुमित हांडोरे याने आपल्या हातातील धारदार चॉपरने राहुलवर सपासप वार केले, तर त्याच्या इतर साथीदारांनी लाकडी आणि लोखंडी दांडक्यांनी अमानुष मारहाण केली. या जीवघेण्या हल्ल्यात गंभीर जखमी झालेल्या राहुलचा उपचारादरम्यान मृत्यू झाला, आणि या प्रकरणाने खुनाचे गंभीर वळण घेतले. यानंतर आडगाव पोलीस ठाण्यात खुनाचा गुन्हा दाखल करण्यात आला होता.
पोलिसांनी असा आवळला फास
घटनेचे गांभीर्य ओळखून पोलीस आयुक्त संदिप कर्णिक, पोलीस उप-आयुक्त (गुन्हे) किरणकुमार चव्हाण आणि सहाय्यक पोलीस आयुक्त संदिप मिटके यांनी गुन्हे शाखा युनिट १ चे वरिष्ठ पोलीस निरीक्षक मधुकर कड यांना तात्काळ तपासाचे आदेश दिले.
श्री. कड यांच्या नेतृत्वाखालील पथकाने तपासाची चक्रे वेगाने फिरवली. आरोपी शहराबाहेर पळून जाण्याच्या तयारीत असल्याची कुणकुण लागताच पथक अधिक सतर्क झाले.
पहिला दणका: पथकातील अत्यंत अनुभवी पोलीस हवालदार प्रशांत मरकड आणि मिलींदसिंग परदेशी यांना त्यांच्या विश्वासू गुप्त खबऱ्याकडून पक्की माहिती मिळाली की, आरोपी संतोष बाळू मते (वय ४०) हा वाडीवऱ्हे गावातील कवटी फाट्यावर येणार आहे. क्षणाचाही विलंब न लावता पथकाने त्या ठिकाणी सापळा रचला आणि गणेश वडापाव समोरून संतोषच्या मुसक्या आवळल्या.
दुसरा दणका: एक आरोपी ताब्यात येताच पथकाचा आत्मविश्वास दुणावला. तेवढ्यात, पथकातील दुसरे धाडसी पोलीस हवालदार विशाल देवरे आणि प्रविण वाघमारे यांना दुसरा आरोपी स्वप्नील मदन बागुल (वय ३३) हा सातपूर परिसरातील पपया नर्सरी जवळ येणार असल्याची खबर मिळाली. पथकाने तात्काळ सातपूरकडे कूच केली आणि स्वप्नीललाही बेड्या ठोकल्या.
चौकशीदरम्यान, दोन्ही आरोपींनी आपल्या साथीदारांसह गुन्हा केल्याची कबुली दिली असून, त्यांना पुढील कारवाईसाठी आडगाव पोलिसांच्या ताब्यात देण्यात आले आहे.
यांच्या शौर्याला सलाम
ही संपूर्ण कारवाई पोलीस आयुक्त संदिप कर्णिक, पोलीस उप-आयुक्त किरणकुमार चव्हाण व सहाय्यक पोलीस आयुक्त संदिप मिटके यांच्या मार्गदर्शनाखाली पार पडली.
गुन्हे शाखा युनिट १ चे वरिष्ठ पोलीस निरीक्षक मधुकर कड यांच्या नेतृत्वाखाली पोलीस उपनिरीक्षक चेतन श्रीवंत, पोलीस उपनिरीक्षक सुदाम सांगळे, पोलीस उपनिरीक्षक किरण शिरसाठ यांच्यासह पोलीस हवालदार प्रदीप म्हसदे, मिलींदसिंग परदेशी, प्रविण वाघमारे, विशाल देवरे, प्रशांत मरकड, योगीराज गायकवाड, संदीप भांड, नाजीमखान पठाण, रोहिदास लिलके आणि पोलीस अंमलदार मुक्तार शेख, अमोल कोष्टी व महिला पोलीस अंमलदार मनिषा सरोदे यांच्या पथकाने हे यश मिळवले आहे. त्यांच्या या कामगिरीमुळे नाशिक पोलिसांच्या शिरपेचात आणखी एक मानाचा तुरा खोवला गेला आहे.
