पहिल्याच दिवशी दाखवला ‘वैज्ञानिक’ चमत्कार; घटनास्थळावरूनच उचलले ठोस पुरावे, आरोपींना आता पळवाट नाही!
लाल 🚨 दिवा-नाशिक, दि. २९ (विशेष प्रतिनिधी):केवळ घोषणा नाही, तर प्रत्यक्ष कृती! नाशिक शहर पोलीस दलाच्या ताफ्यात काल, दि. २७ ऑगस्ट रोजी, दाखल झालेल्या अत्याधुनिक ‘मोबाईल फॉरेन्सिक व्हॅन’ने २४ तास उलटायच्या आतच आपली ताकद दाखवून दिली आहे. नाशिकरोड पोलीस स्टेशन हद्दीत घडलेल्या एका गंभीर गुन्ह्याच्या तपासासाठी या ‘हाय-टेक ब्रह्मास्त्रा’चा आज प्रथमच वापर करण्यात आला. एखाद्या चित्रपटाच्या दृश्याप्रमाणे, ही व्हॅन सायरन वाजवत घटनास्थळी दाखल झाली आणि तज्ज्ञांच्या पथकाने कामाला सुरुवात करताच, गुन्हेगारांच्या मनात धडकी भरवणारी कारवाई सुरू झाली.
प्रत्यक्ष ‘ओपनिंग’ नाशिकरोडच्या गुन्ह्यात !
काल पोलीस आयुक्त श्री. संदिप कर्णिक यांनी या व्हॅनचे उद्घाटन करताना “गुन्हेगारांना आता कायद्याच्या कचाट्यातून सुटणे अशक्य होईल,” असा विश्वास व्यक्त केला होता. तो शब्द न शब्द खरा ठरवत, नाशिकरोड पोलीस स्टेशनमध्ये दाखल झालेल्या एका गुन्ह्याच्या तपासासाठी वरिष्ठांच्या आदेशाने ही व्हॅन तात्काळ रवाना करण्यात आली. गुन्ह्याचे गांभीर्य ओळखून, कोणताही पुरावा नष्ट होऊ नये किंवा त्यात फेरफार होऊ नये, यासाठी हा महत्वपूर्ण निर्णय घेण्यात आला.
घटनास्थळावर काय घडले?
ही व्हॅन घटनास्थळी पोहोचताच, सोबत असलेल्या न्यायसहायक वैज्ञानिक प्रयोगशाळेच्या तज्ज्ञांनी संपूर्ण परिसराचा ताबा घेतला. सामान्य डोळ्यांना दिसणार नाहीत असे सूक्ष्म-तिसूक्ष्म पुरावे गोळा करण्यासाठी त्यांनी जागतिक दर्जाच्या उपकरणांचा वापर सुरू केला. रक्ताचे नमुने, केसांचे अंश, बोटांचे ठसे आणि गुन्हेगाराने मागे सोडलेल्या इतर अनेक महत्त्वाच्या वस्तू अत्यंत शास्त्रीय पद्धतीने गोळा करण्यात आल्या. हे सर्व पुरावे व्हॅनमध्येच असलेल्या प्रयोगशाळेत सुरक्षितपणे सीलबंद करण्यात आले. या तत्पर कारवाईमुळे गुन्ह्याचा तपास सुरुवातीपासूनच योग्य दिशेने आणि प्रचंड वेगाने सुरू झाला आहे.
आता गुन्हा उघडकीस येण्यास १००% मदत !
या व्हॅनद्वारे गोळा करण्यात आलेले पुरावे न्यायालयात ‘अभेद’ आणि ‘निर्विवाद’ मानले जातात. त्यामुळे आता या गुन्ह्यातील आरोपी कितीही चलाख असला तरी, वैज्ञानिक पुराव्यांसमोर त्याचे नाटक चालणार नाही. घटनास्थळावरून मिळालेल्या या पुराव्यांमुळे आरोपींना शिक्षा होण्याचे (दोषसिद्धीचे) प्रमाण वाढणार असून, नाशिक पोलिसांच्या तपास क्षमतेवर शिक्कामोर्तब झाले आहे.
या पहिल्याच यशस्वी कामगिरीमुळे नाशिक शहर पोलीस दलाचे मनोधैर्य उंचावले आहे. ही केवळ एका गुन्ह्याच्या तपासाची सुरुवात नसून, नाशिक शहराला गुन्हेगारीमुक्त करण्याच्या दिशेने उचललेले एक क्रांतिकारी पाऊल आहे, हेच यातून सिद्ध झाले आहे.
