गुन्हे शाखा युनिट-२ ची धडाकेबाज कामगिरी; मालेगाव, शिर्डी, श्रीरामपूरपर्यंत पसरलेल्या रॅकेटच्या मुसक्या आवळल्या!
लाल 🚨 दिवा-नाशिक:दि.१७:- शहरात वाढत्या मोटारसायकल चोरीच्या घटनांनी त्रस्त झालेल्या नागरिकांना मोठा दिलासा देणारी बातमी आहे. नाशिक शहर गुन्हे शाखा युनिट-२ च्या पथकाने एका मोठ्या कारवाईत, चोरीच्या मोटारसायकली विकत घेणाऱ्या तीन सराईत खरेदीदारांच्या मुसक्या आवळल्या आहेत. त्यांच्याकडून तब्बल ४ लाख ७० हजार रुपये किमतीच्या ०७ दुचाकी जप्त करण्यात आल्या असून, या कारवाईमुळे नाशिक शहरातील विविध पोलीस ठाण्यांमधील ०७ गुन्हे एकाच वेळी उघडकीस आले आहेत. या धडाकेबाज कामगिरीमुळे वाहनचोर आणि चोरटा माल खरेदी करणाऱ्यांचे धाबे दणाणले आहेत.
शहरात मोटारसायकल चोरीचे सत्र सुरू झाल्याने पोलीस आयुक्त श्री. संदीप कर्णिक यांनी गुन्हेगारीला आळा घालण्यासाठी कठोर पावले उचलण्याचे आदेश दिले होते. पोलीस उप-आयुक्त (गुन्हे) श्री. किरणकुमार चव्हाण आणि सहायक पोलीस आयुक्त (गुन्हे) श्री. संदीप मिटके यांनी गुन्हे शाखा युनिट-२ ला विशेष सूचना देत या गुन्ह्यांचा छडा लावण्याचे आव्हान दिले होते. वरिष्ठांच्या मार्गदर्शनाखाली गुन्हे शाखा युनिट-२ चे प्रभारी अधिकारी, सपोनि हेमंत तोडकर यांनी आपल्या पथकासह तपासाची चक्रे वेगाने फिरवली.
असा लागला छडा: सीसीटीव्ही आणि गुप्त बातमीदाराने केली कमाल!
गुन्हे शाखेच्या पथकाने चोरीच्या प्रत्येक घटनास्थळी जाऊन बारकाईने पाहणी केली. परिसरातील शेकडो सीसीटीव्ही फुटेज तपासले आणि तांत्रिक विश्लेषणाची जोड देत आरोपींचा माग काढण्यास सुरुवात केली. तपास सुरू असतानाच, पोलिसांच्या एका विश्वासू गुप्त बातमीदाराने (खबऱ्याने) एक अत्यंत महत्त्वाची माहिती दिली. रेकॉर्डवरील सराईत गुन्हेगार ‘राजन’ हा नाशिक शहरातून मोटारसायकली चोरून त्या मालेगाव, श्रीरामपूर आणि शिर्डी परिसरात विक्री करत असल्याची पक्की खबर पोलिसांना मिळाली.
१५ दिवसांचे अथक परिश्रम, अखेर सापळा यशस्वी!
या माहितीच्या आधारे सपोनि हेमंत तोडकर यांनी तात्काळ एक विशेष पथक तयार केले. या पथकात श्रेणी पोलीस उपनिरीक्षक मुक्तारखान पठाण, सपोउनि गुलाब सोनार, पोहवा अतुल पाटील, परमेश्वर दराडे, वाल्मिक चव्हाण, मनोज परदेशी यांचा समावेश होता. या पथकाने मागील १५ दिवसांपासून मालेगाव, श्रीरामपूर आणि शिर्डी परिसरात तळ ठोकला. वेशांतर करून आणि तांत्रिक माहितीच्या आधारे त्यांनी चोरट्या मालाच्या खरेदीदारांचा शोध सुरू केला. अथक परिश्रमानंतर अखेर पोलिसांना यश आले आणि त्यांनी तीन संशयितांना वेगवेगळ्या ठिकाणांहून ताब्यात घेतले.
पोलिसांनी १) अरविंद महादेव सोनवणे (वय २४, रा. कालिकानगर, शिर्डी), २) जुबेर मुक्तार अख्तर (वय २०, रा. मालेगाव), आणि ३) वैभव बंडू काळे (वय २८, रा. ममदापूर, ता. राहाता) यांना ताब्यात घेऊन त्यांची कसून चौकशी केली. सुरुवातीला उडवाउडवीची उत्तरे देणाऱ्या या त्रिकुटाने पोलिसांचा खाक्या दिसताच पोपटासारखे बोलायला सुरुवात केली आणि आपण रेकॉर्डवरील गुन्हेगार ‘राजन’ याच्याकडून स्वस्तात चोरीच्या मोटारसायकली खरेदी केल्याची कबुली दिली.
लाखोंचा मुद्देमाल जप्त, ७ गुन्हे उघड!
आरोपींनी दिलेल्या कबुलीनंतर पोलिसांनी त्यांच्या ताब्यातून ०२ पल्सर मोटारसायकली आणि ०५ ॲक्सेस मोपेड गाड्या अशा एकूण ४,७०,००० रुपये किमतीच्या ०७ दुचाकी जप्त केल्या. या जप्तीमुळे नाशिक शहरातील खालील पोलीस ठाण्यांमधील गुन्हे उघडकीस आले आहेत:
पंचवटी पोलीस ठाणे: गुन्हा रजि. नं. ५५४/२०२४
पंचवटी पोलीस ठाणे: गुन्हा रजि. नं. ३९०/२०२५
आडगाव पोलीस ठाणे: गुन्हा रजि. नं. ३४३/२०२५
म्हसरूळ पोलीस ठाणे: गुन्हा रजि. नं. ८३/२०२५
इंदिरानगर पोलीस ठाणे: गुन्हा रजि. नं. २०३/२०२४
उपनगर पोलीस ठाणे: गुन्हा रजि. नं. ६२/२०२५
ठाणे आयुक्तालय हद्दीतून चोरीस गेलेली एक मोपेड.
ताब्यात घेतलेल्या तिन्ही आरोपींना आणि जप्त केलेल्या मुद्देमालाला पुढील कायदेशीर कारवाईसाठी म्हसरूळ पोलीस ठाण्याच्या ताब्यात देण्यात आले आहे. मुख्य सूत्रधार ‘राजन’ याचा शोध पोलीस घेत असून, लवकरच त्यालाही बेड्या ठोकल्या जातील, असा विश्वास पोलिसांनी व्यक्त केला आहे.
सदरची कौतुकास्पद कामगिरी पोलीस आयुक्त श्री. संदिप कर्णिक, उप-आयुक्त श्री. किरणकुमार चव्हाण, सहा. आयुक्त श्री. संदीप मिटके यांच्या मार्गदर्शनाखाली सपोनि हेमंत तोडकर, सपोनि डॉ. समाधान हिरे, पोउनि मुक्तारखान पठाण, सपोउनि गुलाब सोनार आणि त्यांच्या सहकाऱ्यांनी पार पाडली. या कारवाईमुळे नाशिक पोलिसांच्या शिरपेचात आणखी एक मानाचा तुरा रोवला गेला आहे.
