पालकमंत्री पंकजा मुंडे यांच्यासमोरच घडला धक्कादायक प्रकार; पोलीस उपाधीक्षक अनंत कुलकर्णींच्या ‘फिल्मी’ लाथेने महाराष्ट्र हादरला!
लाल 🚨 दिवा-जालना, दि. १५ ऑगस्ट –: ज्या दिवशी सारा देश स्वातंत्र्याचा उत्सव साजरा करत होता, ज्या क्षणी तिरंग्याला सलामी देऊन लोकशाहीच्या मूल्यांची शपथ घेतली जात होती, त्याच पवित्र दिवशी, त्याच तिरंग्याच्या साक्षीने माणुसकीला काळिमा फासणारी एक अत्यंत संतापजनक आणि हृदय पिळवटून टाकणारी घटना जालन्यात घडली. न्यायाच्या अपेक्षेने आलेल्या एका आंदोलकाच्या नशिबी आशीर्वादाऐवजी थेट पोलीस अधिकाऱ्याची लाथ आली, आणि लोकशाही अक्षरशः हतबल झाली.
नेमके काय घडले?
ही कहाणी आहे एका हतबल कुटुंबाची. आपल्या मागण्यांसाठी हे कुटुंब जिल्हाधिकारी कार्यालयासमोर अनेक दिवसांपासून उपोषणाला बसले होते. त्यांचा आवाज कदाचित शासनाच्या बऱ्या झालेल्या कानांपर्यंत पोहोचत नव्हता. आज स्वातंत्र्यदिनानिमित्त जिल्ह्याच्या पालकमंत्री पंकजा मुंडे ध्वजारोहणासाठी येणार असल्याची बातमी त्यांच्यासाठी आशेचा एक किरण घेऊन आली. आपला आवाज थेट मंत्र्यांपर्यंत पोहोचेल, आपल्या व्यथांवर फुंकर घातली जाईल, या भाबड्या आशेने त्यांनी मंत्र्यांना भेटण्याचा प्रयत्न केला.
मात्र, त्यांच्या आशेच्या या किरणांवर पोलीस उपाधीक्षक अनंत कुलकर्णी एखाद्या खलनायकाप्रमाणे धावून आले. गर्दीतून वाट काढत मंत्र्यांकडे धाव घेणाऱ्या त्या आंदोलकाला रोखण्यासाठी त्यांनी कायद्याच्या बळाचा नव्हे, तर पाशवी शक्तीचा वापर केला. एखाद्या चित्रपटातील दृश्यालाही लाजवेल अशा अविर्भावात, त्यांनी त्या हतबल आंदोलकाच्या कमरेत थेट आणि जोरदार लाथ घातली. क्षणार्धात तो आंदोलक जमिनीवर कोसळला आणि न्यायाची आर्त किंकाळी हवेतच विरून गेली.
माणुसकीचा पराभव, वर्दीचा उन्माद!
हे सर्व घडत असताना पालकमंत्री पंकजा मुंडे अवघ्या काही अंतरावर होत्या. ज्यांच्याकडून न्यायाची अपेक्षा होती, त्यांच्याच डोळ्यांदेखत हा अमानुष प्रकार घडला. ज्या पोलिसांनी जनतेचे रक्षण करायचे, त्याच पोलिसांच्या बुटांनी न्यायाची मागणी करणाऱ्याला तुडवले. अनंत कुलकर्णी यांनी मारलेली ती लाथ केवळ एका व्यक्तीच्या कमरेत बसली नाही, तर ती लोकशाहीच्या छातीवर बसलेला एक जबर प्रहार होता. वर्दीच्या आत दडलेला अहंकार आणि सत्तेचा माज किती क्रूर असू शकतो, याचे हे जिवंत उदाहरण होते.
या घटनेचा व्हिडीओ सोशल मीडियावर वाऱ्यासारखा पसरला असून, सर्वसामान्यांपासून ते राजकीय वर्तुळातून संतापाची लाट उसळली आहे. “न्याय मागण्याची हीच शिक्षा का?”, “रक्षकच जर भक्षक बनले, तर दाद मागावी कोणाकडे?” असे संतप्त सवाल विचारले जात आहेत. स्वातंत्र्यदिनीच नागरिकांच्या हक्कांची अशी पायमल्ली होत असेल, तर या स्वातंत्र्याचा अर्थ तो काय?
आता या प्रकरणाची सखोल चौकशी होऊन दोषी पोलीस अधिकाऱ्यावर कठोर कारवाई होणार का, याकडे संपूर्ण महाराष्ट्राचे लक्ष लागले आहे. अन्यथा, जनतेचा कायद्यावरील आणि लोकशाहीवरील विश्वास उडाल्याशिवाय राहणार नाही
