पंचवटी असुरक्षित! धाडसी घरफोडी, अल्पवयीन मुलीचे अपहरण आणि वाहनचोरीने खळबळ.
लाल 🚨 दिवा-नाशिक, दि. १५ ऑगस्ट: पंचवटी परिसरात गुन्हेगारांनी अक्षरशः धुमाकूळ घातला असून, एकाच दिवशी घरफोडी, अल्पवयीन मुलीचे अपहरण आणि वाहनचोरीच्या घटनांनी संपूर्ण परिसर हादरला आहे. चोरट्यांच्या या धाडसी कृत्यांमुळे नागरिकांमध्ये भीतीचे वातावरण पसरले असून, पोलिसांच्या कार्यक्षमतेवर मोठे प्रश्नचिन्ह निर्माण झाले आहे.
शिंदेनगरमध्ये बंद घराला लक्ष्य, लाखाचा ऐवज लंपास
पंचवटीतील मखमलाबाद रोडवरील शिंदेनगर भागातील दर्पण विहार अपार्टमेंटमध्ये राहणारे बांधकाम व्यावसायिक श्री. करण सुनिल खरे (वय ३०) यांच्या बंद फ्लॅटचा कोयंडा तोडून अज्ञात चोरट्यांनी तब्बल ९२,२०० रुपयांचा ऐवज लंपास केला आहे. ही घटना १२ ऑगस्टच्या दुपारपासून १३ ऑगस्टच्या सकाळच्या दरम्यान घडली.
खरे कुटुंबीय बाहेर गेले असल्याची संधी साधून चोरट्यांनी घरात प्रवेश केला. कपाटातील सोन्याचे दागिने, ज्यात कानातले टॉप्स, अंगठी, मंगळसूत्र आणि ३२,००० रुपयांची रोकड असा मुद्देमाल चोरून नेला. एवढेच नव्हे तर, चोरट्यांनी शेजारी राहणाऱ्या चंद्रकांत शेजवळ यांच्या घरातूनही ५,००० रुपये रोख आणि चांदीचा दिवा चोरून नेला. या धाडसी घरफोडीमुळे परिसरात खळबळ उडाली असून, पंचवटी पोलीस ठाण्यात भारतीय न्याय संहितेच्या विविध कलमांनुसार गुन्हा दाखल करण्यात आला आहे. वरिष्ठ पोलीस निरीक्षक पाटील यांच्या मार्गदर्शनाखाली पोलीस हवालदार शेळके पुढील तपास करत आहेत.
फुलेनगरातून अल्पवयीन मुलगी दिवसाढवळ्या गायब!
एका अत्यंत धक्कादायक घटनेत, फुलेनगर येथील पाटील दवाखान्याजवळील सार्वजनिक शौचालयातून बाहेर आलेल्या एका अल्पवयीन मुलीचे अज्ञात इसमाने अपहरण केल्याची घटना घडली आहे. १४ ऑगस्ट रोजी दुपारी ४ वाजण्याच्या सुमारास ही घटना घडली.
पीडित मुलगी शौचालयातून बाहेर येताच, दबा धरून बसलेल्या नराधमाने तिला अज्ञात कारणासाठी कायदेशीर पालकांच्या ताब्यातून पळवून नेले. या घटनेने परिसरात संतापाची लाट उसळली असून, महिला आणि मुलींच्या सुरक्षेचा प्रश्न पुन्हा एकदा ऐरणीवर आला आहे. फिर्यादी पालकांच्या तक्रारीवरून पंचवटी पोलिसांनी भारतीय न्याय संहिता कलम १३७ (२) नुसार अपहरणाचा गुन्हा दाखल केला असून, पोलीस उपनिरीक्षक जाधव या प्रकरणाचा कसून तपास करत आहेत. मुलीचा शोध घेण्यासाठी पोलिसांची पथके रवाना झाली आहेत.
गोदाघाटावरून दुचाकी लंपास, भाविकांच्या सुरक्षेचा प्रश्न ऐरणीवर
शहरातील सर्वात वर्दळीचे ठिकाण असलेल्या पंचवटीतील गोदाघाटावरील यशवंतराव महाराज पटांगणातून एका तरुणाची मोटारसायकल चोरीला गेल्याची घटना उघडकीस आली आहे. ११ ऑगस्ट रोजी रात्री ८ ते ९ च्या दरम्यान ही चोरी झाली.
उगाव येथील प्रवीण एकनाथ आहेर (वय ३१) यांनी आपली हिरो पॅशन प्रो (एम.एच. १५ ई.जे. ५२३५) ही २०,००० रुपये किमतीची मोटारसायकल पटांगणात हँडल लॉक करून उभी केली होती. मात्र, अवघ्या एका तासात अज्ञात चोरट्याने ती चोरून नेली. याप्रकरणी पंचवटी पोलीस ठाण्यात गुन्हा दाखल करण्यात आला असून, सहाय्यक पोलीस उपनिरीक्षक सुनील शेवाळे तपास करत आहेत. गोदाघाटासारख्या पवित्र आणि वर्दळीच्या ठिकाणाहून वाहनचोरी झाल्याने भाविक आणि पर्यटकांच्या सुरक्षेबाबत चिंता व्यक्त केली जात आहे.
