स्थानिक गुन्हे शाखेची थरारक कामगिरी; दोन मोठ्या गुन्ह्यांची उकल, गावठी पिस्तूलसह सराईत गुन्हेगारांच्या मुसक्या आवळल्या.
लाल 🚨 दिवा-नाशिक, दि. ३१ (आमच्या प्रतिनिधीन) :- :नाशिक ग्रामीण जिल्ह्याला हादरवून सोडणाऱ्या दोन वेगवेगळ्या गंभीर गुन्ह्यांची उकल करण्यात स्थानिक गुन्हे शाखेला (LCB) मोठे यश आले आहे. एका घटनेत, सटाणा आणि चांदवड परिसरातील मंदिरांना लक्ष्य करून देव्हाऱ्यालाच हात घालणाऱ्या सराईत चोरट्यांना येवला बसस्थानक परिसरातून बेड्या ठोकण्यात आल्या, तर दुसऱ्या एका थरारक कारवाईत, मालेगाव शहरात दिवसाढवळ्या गोळीबार करून दहशत माजवणाऱ्या आणि प्राणघातक हल्ला करणाऱ्या कुख्यात गुन्हेगारांच्या टोळीला म्हाळदे शिवारातून जेरबंद करण्यात आले आहे. या दोन्ही कारवायांमध्ये पोलिसांनी अत्यंत कौशल्याने सापळा रचून आरोपींच्या मुसक्या आवळल्याने गुन्हेगारी विश्वात मोठी खळबळ उडाली आहे.
देव्हाऱ्यालाच घातला होता हात! मंदिर चोरांच्या टोळीचा पर्दाफाश
गेल्या काही दिवसांपासून सटाणा आणि चांदवड तालुक्यातील भाविकांमध्ये भीतीचे वातावरण निर्माण करणाऱ्या मंदिर चोरांना अखेर पोलिसांनी गजाआड केले आहे. दिनांक १९/०७/२०२५ रोजी पहाटेच्या सुमारास सटाणा तालुक्यातील ठेंगोडा येथील प्रसिद्ध गणपती मंदिरातून अज्ञात चोरट्यांनी दानपेटी आणि पितळेची मूर्ती असा एकूण ३०,००० रुपयांचा ऐवज लंपास केला होता. या घटनेने परिसरात मोठी खळबळ उडाली होती. याप्रकरणी सटाणा पोलीस ठाण्यात गुन्हा दाखल करण्यात आला होता. या घटनेच्या एक दिवस आधी, म्हणजेच १८/०७/२०२५ रोजी, चांदवड शहरातील रेणुका देवी मंदिराचे कुलूप तोडून चोरीचा अयशस्वी प्रयत्न देखील झाला होता.
या सलग घटनांचे गांभीर्य लक्षात घेऊन नाशिक ग्रामीण पोलीस अधीक्षक श्री. बाळासाहेब पाटील यांनी तपासाची सूत्रे स्थानिक गुन्हे शाखेकडे दिली. स्थानिक गुन्हे शाखेचे पोलीस निरीक्षक श्री. रविंद्र मगर आणि सटाणा पोलीस ठाण्याचे पोलीस निरीक्षक श्री. योगेश पाटील यांच्या संयुक्त पथकाने तपासाची चक्रे फिरवली. गुन्हा करण्याच्या पद्धतीचा अभ्यास करून आणि घटनास्थळावरील तांत्रिक पुराव्यांचे विश्लेषण करून पोलिसांनी गुप्त बातमीदारांचे जाळे विणले. मिळालेल्या खात्रीशीर माहितीच्या आधारे, पोलिसांनी येवला बसस्थानक परिसरात अत्यंत शिताफीने सापळा रचला आणि दोन सराईत गुन्हेगारांना ताब्यात घेतले.
१) भगवान गोमा पिंपळे (वय ३४, रा. मतोबाचे शिंगवे, ता. चांदवड)
२) भाऊराव रघुनाथ पवार (वय ३०, रा. सावरगाव, ता. येवला)
पोलिसी खाक्या दाखवताच दोघांनीही दोन्ही मंदिरांमधील गुन्हे केल्याची कबुली दिली. आरोपी भगवान पिंपळे हा सराईत गुन्हेगार असून त्याच्यावर मनमाड शहर व रेल्वे पोलीस ठाण्यात यापूर्वीही जबरी चोरीचे गुन्हे दाखल आहेत. या दोघांकडून आणखी काही गुन्हे उघडकीस येण्याची शक्यता पोलिसांनी वर्तवली आहे.
मालेगावात दिवसाढवळ्या रक्ताचा सडा! गोळीबार करणारे गुंड जेरबंद
मालेगाव शहराला हादरवून सोडणाऱ्या गोळीबार प्रकरणातील मुख्य आरोपी आणि त्याच्या साथीदारांना स्थानिक गुन्हे शाखेने सिनेस्टाईल पाठलाग करून अटक केली आहे. दिनांक २९/०७/२०२५ रोजी मालेगावच्या पवारवाडी पोलीस ठाणे हद्दीत जुन्या भांडणाचा राग मनात धरून रब्बानी नावाच्या गुंडाने त्याचा साथीदारांसह अनिस शेख रशिद उर्फ अनिस मटकी याच्यावर प्राणघातक हल्ला केला होता. रब्बानीने त्याच्याकडील गावठी पिस्तुलातून अनिसवर गोळी झाडली, तर त्याच्या साथीदारांनी कोयता आणि लोखंडी पाईपने हल्ला करून त्याला गंभीर जखमी केले होते. या घटनेनंतर शहरात दहशतीचे वातावरण पसरले होते आणि सर्व आरोपी फरार झाले होते.
घटनेचे गांभीर्य ओळखून पोलीस अधीक्षक श्री. बाळासाहेब पाटील यांनी आरोपींना तात्काळ अटक करण्याचे आदेश दिले. स्थानिक गुन्हे शाखेचे पोलीस निरीक्षक श्री. रविंद्र मगर यांना त्यांच्या खबऱ्यांमार्फत आरोपी म्हाळदे शिवारातील ११ हजार कॉलनी परिसरात लपून बसल्याची पक्की खबर मिळाली. या माहितीच्या आधारे, स्थानिक गुन्हे शाखेच्या पथकाने परिसरात वेढा घालून सापळा रचला आणि खालील चार सराईत गुन्हेगारांना ताब्यात घेतले:
१) शेख रब्बानी शेख कादीर (वय ३४) – मुख्य आरोपी
२) नईम अख्तर अब्दुल करीम उर्फ नईम टिक्का (वय ३८)
३) शेख वामिस शेख युनूस (वय २२)
४) शेख शब्बीर शेख फारूक उर्फ बीरे (वय २४)
चौकशीदरम्यान, आरोपींनी गुन्ह्याची कबुली दिली आहे. आरोपी शेख वामिस याच्याकडून एक गावठी पिस्तूल (कट्टा) जप्त करण्यात आले आहे. हे सर्व आरोपी सराईत गुन्हेगार असून त्यांच्यावर मालेगाव शहरातील विविध पोलीस ठाण्यांमध्ये खुनाचा प्रयत्न, दरोडा आणि मारामारी असे एकूण ७ गंभीर गुन्हे दाखल आहेत.
पोलीस पथकाचे सर्वत्र कौतुक
नाशिक ग्रामीण जिल्हा पोलीस अधीक्षक श्री. बाळासाहेब पाटील, अपर पोलीस अधीक्षक मालेगाव श्री. तेगबीर सिंह संधू, उपविभागीय पोलीस अधिकारी श्री. नितीन गणापुरे व श्री. बाजीराव महाजन यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. रविंद्र मगर, सटाणा पोलीस ठाण्याचे पोलीस निरीक्षक श्री. योगेश पाटील आणि त्यांच्या संपूर्ण पथकाने ही धाडसी आणि कौतुकास्पद कामगिरी केली आहे. या यशस्वी कारवायांमुळे नाशिक ग्रामीण पोलिसांनी गुन्हेगारांवर वचक निर्माण केला असून नागरिकांमधून पोलिसांच्या कामगिरीचे कौतुक होत आहे.
