पोलीस आयुक्त संदीप कर्णिक यांच्या संकल्पनेला मूर्त स्वरूप; नाशिकरोड विभागात फिर्यादींच्या चेहऱ्यावर फुलले हसू!
लाल 🚨 दिवा नाशिक, दि. ३० :नाशिक शहरात गुन्हेगारांना सळो की पळो करून सोडणाऱ्या शहर पोलिसांनी आता नागरिकांचे हक्काचे धन त्यांना परत करण्याचा धडाका लावला आहे. पोलीस आयुक्त मा. श्री. संदिप कर्णिक यांच्या दूरदृष्टी आणि संवेदनशील संकल्पनेतून, नाशिकरोड विभागातील विविध गुन्ह्यांमध्ये चोरीला गेलेला तब्बल ४९ लाख रुपयांचा मुद्देमाल मूळ मालकांना परत करण्यात आला. पोलिसांच्या या कामगिरीमुळे नागरिकांनी सुटकेचा निःश्वास सोडला असून, त्यांच्या चेहऱ्यावर आनंद आणि समाधान स्पष्ट दिसत होते.
गेल्या काही काळात नाशिकरोड, उपनगर आणि देवळाली कॅम्प पोलीस ठाण्याच्या हद्दीत चोरी, घरफोडी, सोनसाखळी व मोबाईल चोरीच्या घटना घडल्या होत्या. नाशिक पोलिसांनी अत्यंत वेगाने आणि कौशल्याने तपास करत या गुन्ह्यांची उकल केली आणि चोरट्यांना गजाआड केले. केवळ गुन्हेगारांना पकडूनच पोलीस थांबले नाहीत, तर त्यांच्याकडून जप्त केलेला मुद्देमाल मूळ फिर्यादींपर्यंत पोहोचवण्यासाठी एक विशेष मोहीम हाती घेतली.
याच मोहिमेअंतर्गत आज, दिनांक ३० जुलै २०२५ रोजी, पोलीस उप आयुक्त (परिमंडळ २) श्री. किशोर काळे आणि नाशिकरोड विभागाचे सहायक पोलीस आयुक्त डॉ. श्री. सचिन बारी यांच्या प्रमुख उपस्थितीत एका भव्य कार्यक्रमाचे आयोजन करण्यात आले. यावेळी २५ फिर्यादींना त्यांच्या हक्काच्या वस्तू परत देण्यात आल्या.
कार्यवाहीचा तपशील:
नाशिकरोड पोलीस ठाणे: १४ गुन्ह्यांमधील ३२ लाख १४ हजार रुपयांचा मुद्देमाल परत.
उपनगर पोलीस ठाणे: ११ गुन्ह्यांमधील १४ लाख १३ हजार रुपयांचा मुद्देमाल परत.
देवळाली कॅम्प पोलीस ठाणे: विविध गुन्ह्यांमधील ३ लाख १८ हजार रुपयांचा मुद्देमाल परत.
आपली चोरीला गेलेली संपत्ती परत मिळताच फिर्यादींच्या डोळ्यात आनंदाश्रू तरळले होते. त्यांनी पोलिसांच्या या जलद आणि प्रभावी कार्याबद्दल कृतज्ञता व्यक्त केली. “आमची आशाच संपली होती, पण नाशिक पोलिसांनी आमचा विश्वास सार्थ ठरवला,” अशा भावना अनेक फिर्यादींनी व्यक्त केल्या.
ही यशस्वी मोहीम पोलीस आयुक्त श्री. संदिप कर्णिक यांच्या आदेशाने आणि श्री. किशोर काळे व डॉ. सचिन बारी यांच्या मार्गदर्शनाखाली पार पडली. नाशिकरोडचे वरिष्ठ पोलीस निरीक्षक श्री. जितेंद्र सपकाळे, उपनगरचे श्री. जयंत शिरसाठ आणि देवळाली कॅम्पचे श्री. श्रीनिवास देशमुख यांच्यासह सर्व मुद्देमाल कारकुनांनी या कार्यक्रमाच्या यशस्वीतेसाठी अथक परिश्रम घेतले. नाशिक पोलिसांच्या या चमकदार कामगिरीने गुन्हेगारांवर वचक निर्माण झाला असून, नागरिकांमध्ये सुरक्षिततेची भावना वाढीस लागली आहे.
