लाल 🚨 दिवा-नाशिक,दि.२६:- (विशेष प्रतिनिधी):नाशिक शहर पोलीस दलात आज अचानक एकच खळबळ उडाली आहे! शहर पोलीस आयुक्त संदीप कर्णिक यांनी आपल्या ‘धडक’ कार्यशैलीचा प्रत्यय देत शहरातील तीन बड्या पोलीस निरीक्षकांच्या (PI) खांदेपालटाचा मोठा निर्णय घेतला आहे. प्रशासकीय निकड आणि कायदा-सुव्यवस्थेचे कारण देत काढलेल्या या ‘तात्पुरत्या’ बदल्यांच्या आदेशामुळे पोलीस वर्तुळात जोरदार चर्चांना उधाण आले आहे.
🔥 सायबरचे ‘पिसे’ आता आडगावचे ‘प्रभारी’!
या बदल्यांमध्ये सर्वाधिक लक्ष वेधून घेतले आहे ते पोलीस निरीक्षक संजय मारुती पिसे यांनी! सायबर गुन्हेगारांच्या मुसक्या आवळणाऱ्या सायबर पोलीस ठाण्याची धुरा सांभाळणाऱ्या पिसे यांच्यावर आता आयुक्तांनी मोठी जबाबदारी टाकली आहे. त्यांच्याकडे आता ‘आडगाव पोलीस ठाण्या’चा प्रभारी पदभार सोपवण्यात आला आहे. सर्वात मोठी ‘ब्रेकिंग’ म्हणजे, त्यांना सायबर पोलीस ठाण्याचा अतिरिक्त कार्यभारही सांभाळायचा आहे. म्हणजेच पिसे साहेब आता नाशिकमध्ये ‘डबल ड्युटी’ बजावताना दिसणार आहेत! त्यांनी उमेश नानाजी पाटील यांची जागा घेतली आहे.
⚡ मुंबई नाक्यावर ‘देशमुख’ तर देवळालीत ‘पाटील’ यांची एन्ट्री!
दुसरी मोठी घडामोड म्हणजे, मुंबई नाका पोलीस ठाण्याचे विद्यमान प्रभारी अधिकारी विश्वास रोहिदास पाटील हे येत्या ३१ मे रोजी सेवेतून निवृत्त होत आहेत. त्यांच्या या रिक्त होणाऱ्या अत्यंत महत्त्वाच्या ‘हॉट सीट’वर आता देवळाली कॅम्पचे पोलीस निरीक्षक श्रीनिवास भगवान देशमुख यांची वर्णी लागली आहे!
तर दुसरीकडे, आडगाववरून हटवण्यात आलेले पोलीस निरीक्षक उमेश नानाजी पाटील यांना आता ‘देवळाली कॅम्प’ पोलीस ठाण्याची सूत्रे देण्यात आली आहेत. थोडक्यात सांगायचे तर, आडगावचे पाटील देवळालीत आणि देवळालीचे देशमुख थेट मुंबई नाक्यावर… असा हा पोलिसांमधला ‘म्युझिकल चेअर’चा खेळ रंगला आहे!
🚨 तात्काळ हजर होण्याचे कडक आदेश!
पोलीस आयुक्तांनी काढलेल्या या आदेशात कोणतीही पळवाट ठेवलेली नाही. या सर्व अधिकाऱ्यांनी ‘तात्काळ’ आपल्या नव्या नियुक्तीच्या ठिकाणी हजर होऊन कार्यभार हाती घ्यावा आणि तसा अहवाल तातडीने कार्यालयास सादर करावा, असे सक्त आदेश देण्यात आले आहेत. आता या नव्या खांदेपालटामुळे नाशिक शहरातील गुन्हेगारीला कितपत चाप बसतो, हे पाहणे औत्सुक्याचे ठरणार आहे!
