बडगुजर-शहाणे यांच्यात जुंपली ‘शाब्दिक कुस्ती’; विकासकामांना बाजूला ठेवत नेत्यांनी दाखवला ‘अस्सल’ इंगा !
लाल 🚨 दिवा-नाशिक,दि.२९:-सिडको (विशेष प्रतिनिधी):गेल्या अनेक वर्षांपासून कुंभकर्णी झोपेत गेलेली सिडको प्रभाग समिती अखेर अवतीर्ण झाली! “चला, आतातरी नागरी प्रश्न सुटतील,” अशा भाबड्या आशेने सिडकोकर नागरिक डोळे लावून बसले होते. पण थांबा! आमचे माननीय लोकप्रतिनिधी जनतेच्या सेवेसाठी इतके ‘व्याकुळ’ झाले होते की, त्यांनी विकासकामांची ‘ऐसीतैसी’ करत पहिल्याच दिवशी आपापसातील “प्रेम” भरसभेत उधळले.
भाजपाचे ‘जाँबाज’ शिलेदार सुधाकर बडगुजर आणि मुकेश शहाणे यांच्यात नेमक्या कोणत्या ‘देशहितकारक’ मुद्द्यावरून ठिणगी पडली, हे शोधण्यासाठी आता ऐतिहासिक संशोधकाची गरज भासणार आहे. विषयाचे गांभीर्य बाजूला राहिले आणि बघता बघता सभेचे रूपांतर ‘कुरुक्षेत्रात’ झाले. “तू कोण आणि मी कोण!” च्या सुरात दोन्ही नेत्यांनी एकमेकांवर शब्दांचे असे काही बाण चालवले की, सभागृहाचे छत डोक्यावर घ्यायचेच काय ते बाकी उरले होते.
अधिकारी बनले ‘रेफ्री’!
नेहमी फाईलींमध्ये डोकं खुपसून बसणाऱ्या बिचाऱ्या शासकीय अधिकाऱ्यांना आज अचानक ‘डब्ल्यूडब्ल्यूई’ (WWE) च्या रिंगणातील ‘रेफ्री’ची भूमिका बजावावी लागली. “शांत व्हा मायबाप, जनता बघतेय!” असे म्हणत इतर नगरसेवकांनी मध्यस्थी केली, तेव्हा कुठे अनपेक्षितपणे सुरू झालेला हा ‘फ्री-स्टाईल’ सामना थांबला आणि तापलेले वातावरण थोडे ‘कूल’ झाले.
कमाल आहे! वर्षानुवर्षे सिडकोचे रस्ते खड्ड्यात गेलेत, पाणीपुरवठ्याचा बोजवारा उडालाय, स्वच्छतेचा पत्ता नाही. पण पहिल्याच सभेत या गंभीर प्रश्नांवर चर्चा करण्याऐवजी माननीय नगरसेवकांनी एकमेकांचे ‘वजन’ मोजण्यातच धन्यता मानली. शेवटी काय, नागरी सुविधांच्या मुद्द्यांवर नेहमीप्रमाणे ‘वरवरची फुंकर’ मारत सभा गुंडाळण्यात आली.
सिडकोकरांना आता कळून चुकले आहे की, प्रभागात पाण्याचे कारंजे उडो न उडो, पण लोकप्रतिनिधींच्या तोंडून मनोरंजनाचे कारंजे मात्र असेच उडत राहणार! आता बघूया पुढच्या सभेत कोणता ‘नवा अंक’ पाहायला मिळतोय!
