खंडणी गँग’च्या मुसक्या आवळल्या; बारमधील गोळीबार प्रकरणानंतर पोलिसांची आतापर्यंतची सर्वात मोठी कारवाई! संपूर्ण टोळीवर ‘मोक्का’चा फास निश्चित.
लाल 🚨 दिवा-नाशिक,- क्राईम ब्युरो, दि. ०८: शहरात दहशतीचे साम्राज्य निर्माण करणाऱ्या आणि राजकीय पदाचा गैरवापर करून खंडणीचे रॅकेट चालवणाऱ्या लोंढे पिता-पुत्रांना नाशिक पोलिसांनी अखेर बेड्या ठोकल्या आहेत. सातपूर येथील ‘औरा’ बारमधील थरारक गोळीबार आणि चाकू हल्ला प्रकरणानंतर पोलिसांनी २४ तासांच्या आत धडक कारवाई करत आरपीआय (आठवले गट) जिल्हाध्यक्ष प्रकाश लोंढे आणि या टोळीचा मुख्य सूत्रधार असलेला त्याचा मुलगा भूषण ‘नाना’ लोंढे या दोघांनाही अटक केली आहे. या अटकेमुळे नाशिकच्या राजकीय आणि गुन्हेगारी वर्तुळात प्रचंड खळबळ उडाली असून, या संपूर्ण टोळीवर ‘मोक्का’ लावण्याच्या हालचालींना वेग आला आहे.
आरपीआय जिल्हाध्यक्ष प्रकाश लोंढे आणि मुलगा भूषण ‘नाना’ लोंढे यांना अटक.
सातपूरमधील बारमध्ये गोळीबार आणि प्राणघातक हल्ल्याचा आरोप.
संघटित खंडणी रॅकेट चालवल्याचा पोलिसांचा दावा.
संपूर्ण टोळीवर ‘मोक्का’ कायद्यान्वये कारवाईची तयारी पूर्ण.
पोलिसांचा ‘सिंघम’ अवतार; राजकीय दबाव झुगारला!
‘औरा’ बारमधील घटनेनंतर पोलीस आयुक्त संदीप कर्णिक यांच्या मार्गदर्शनाखाली परिमंडळ दोनचे उपायुक्त किशोर काळे यांनी सूत्रे हातात घेतली. कोणताही राजकीय दबाव न जुमानता, पोलिसांनी थेट प्रकाश लोंढे आणि त्यांचा मुलगा भूषण यांना त्यांच्या घरातून उचलले. या कारवाईने हे सिद्ध केले आहे की, शहराची शांतता भंग करणाऱ्या व्यक्ती कितीही मोठ्या पदावर असल्या तरी त्यांची गय केली जाणार नाही.
उपायुक्त किशोर काळे यांनी माहिती देताना सांगितले, **”गुन्हा कोणीही केला तरी कायदा सर्वांसाठी समान आहे. या प्रकरणात मुख्य सूत्रधारांना अटक करण्यात आली आहे. ही फक्त सुरुवात आहे, या टोळीची पाळेमुळे खणून काढून संघटित गुन्हेगारीचे कंबरडे मोडले जाईल. त्यांच्यावर ‘मोक्का’ अंतर्गत कठोर कारवाई प्रस्तावित आहे.”**
सातपूरच्या ‘औरा’ बारमध्ये मध्यरात्री झालेल्या वादात भूषण लोंढे आणि त्याच्या साथीदारांनी एका तरुणावर प्राणघातक हल्ला केला होता. केवळ दहशत माजवण्यासाठी हवेत गोळीबारही करण्यात आला. तपासात असे उघड झाले की, बारमधील वाद मिटवण्याच्या नावाखाली या टोळीने बार मालकाकडून १० टक्के खंडणी स्वरूपात भागीदारी मिळवली होती. जिल्हाध्यक्ष पिता आणि गुंड पुत्र यांनी मिळून शहरात एक संघटित ‘खंडणी रॅकेट’ चालवले असल्याचे पुरावे पोलिसांच्या हाती लागले आहेत.
‘मोक्का’चा फास आवळला!
एकाच गुन्ह्यात दोन किंवा अधिक आरोपींचा सहभाग, संघटितपणे आर्थिक फायद्यासाठी केलेली गुन्हेगारी आणि टोळीची गुन्हेगारी पार्श्वभूमी, या सर्व बाबी ‘मोक्का’ कायद्यासाठी पुरेशा आहेत. लोंढे पिता-पुत्रांच्या अटकेमुळे या टोळीवर ‘मोक्का’ लावण्याचा मार्ग मोकळा झाला आहे. एकदा ‘मोक्का’ लागल्यास आरोपींना किमान सहा महिने जामीन मिळणार नाही, ज्यामुळे या टोळीची दहशत कायमची संपुष्टात येईल.
या धाडसी कारवाईमुळे नाशिक शहर पोलिसांवर कौतुकाचा वर्षाव होत असून, सामान्य नागरिकांनी आणि व्यावसायिकांनी सुटकेचा निःश्वास सोडला आहे.
