🚨 महाठग ‘कॅप्टन’चा नाशिकमध्ये पर्दाफाश! आईच्या मृत्यूची भीती दाखवून मुंबईच्या फायनान्सरला तब्बल पावणे नऊ कोटींचा गंडा! 🚨

अंधारात बोलावून नागाचे दर्शन; रिकाम्या हातातून काजूकतलीचा चमत्कार दाखवून उकळली ८ कोटी ७६ लाखांची खंडणी; ‘जादूटोणा प्रतिबंधक’ कायद्यांतर्गत सरकारवाडा पोलिसांत गुन्हा दाखल.

लाल 🚨 दिवा-नाशिक ,दि.२५:-(विशेष क्राईम प्रतिनिधी):तुमच्या आईचा ‘मृत्यू योग’ आहे… तुमच्या व्यवसायावर ‘गंडांतर’ आले आहे… अशी भिती घालून, अंधाऱ्या डोंगरावर नागाचे दर्शन घडवून आणि रिकाम्या हातातून थेट काजूकतलीचा प्रसाद काढण्याचा चमत्कार दाखवून मुंबईतील एका उच्चशिक्षित बँकिंग फायनान्सरला तब्बल ८ कोटी ७६ लाख ५ हजार ५६० रुपयांचा गंडा घातल्याचा धक्कादायक आणि खळबळजनक प्रकार नाशिकमध्ये उघडकीस आला आहे. याप्रकरणी नाशिकच्या ओकस प्रॉपर्टी आणि शिवनिका संस्थानाचा संस्थापक भोंदू बाबा अशोककुमार एकनाथ खरात ऊर्फ ‘कॅप्टन’ याच्यावर सरकारवाडा पोलीस ठाण्यात गुन्हा दाखल करण्यात आला आहे.

वरळी, मुंबई येथील रहिवासी आणि बँकिंग लोन कन्सल्टंट असलेले ललित प्रकाश पोफळे (वय ४८) यांनी ही फिर्याद दिली आहे. व्यावसायिक कामानिमित्त पोफळे यांची एका बँक अधिकाऱ्याशी ओळख झाली होती. त्याच्याच माध्यमातून पोफळे हे नाशिकच्या कॅनडा कॉर्नर येथील अशोक खरात याच्या संपर्कात आले. खरातने स्वतःला ‘समुद्रशास्त्र’, ‘अंकशास्त्र’ आणि ‘दैवी सिद्धशक्ती’ प्राप्त असल्याचे भासवले.

रिकाम्या हातातून काजूकतली आणि डोंगरावर नागाचा थरार!

पोफळे यांचा विश्वास संपादन करण्यासाठी या भोंदू बाबाने हातचलाखीचा पुरेपूर वापर केला. एकदा गप्पा मारत असताना त्याने आपला रिकामा उजवा हात अचानक बंद केला आणि मुठ उघडून पोफळे यांच्या हातात चक्क ‘काजूकतली’चा प्रसाद दिला! हा चमत्कार पाहून पोफळे भारावून गेले. त्यानंतर खरातने त्यांना वावी गावाजवळील आषापीर बाबा दर्ग्याच्या डोंगरावर अंधारात बोलावले. पोफळे यांना डोळे बंद करून गायत्री मंत्राचा जप करायला लावला. डोळे उघडताच तिथे चक्क एक नाग सरपटत येताना दिसला. “हा नाग म्हणजेच आषापीर बाबा आहेत,” असे सांगून त्याने पोफळे यांच्या मनात प्रचंड दहशत निर्माण केली.

आईच्या मृत्यूची भीती आणि कोट्यवधींची लूट

भोंदू बाबा खरातने पोफळे यांना सांगितले की, “तुमच्या आईचा मृत्यू योग आहे आणि व्यवसायावर मोठे संकट (गंडांतर योग) आहे. हे टाळण्यासाठी ‘अवतार पूजा’ आणि ‘सिद्ध पूजा’ करावी लागेल.” आईच्या जिवाच्या भीतीने घाबरलेल्या पोफळे यांनी आपल्या भावाच्या बँक खात्यातून एकाच दिवशी तब्बल ४ कोटी २५ लाख रुपये अशोक खरातच्या खात्यावर आरटीजीएस (RTGS) द्वारे ट्रान्सफर केले!

तसेच, श्रावण महिन्यात दर सोमवारी अन्नदान करण्यासाठी लाखो रुपये उकळले. एवढेच नाही तर, एका खोट्या शक्तीपीठ महामार्गाचे आमिष दाखवून पोफळे यांना त्यांच्या पत्नीच्या नावे निरुपयोगी जमीन घेण्यास भाग पाडले. जुलै २०१७ ते ऑगस्ट २०२४ या काळात या भामट्याने पोफळे यांच्याकडून पूजा, अन्नदान आणि खंडणीच्या स्वरूपात तब्बल ८,७६,०५,५६०/- रुपये उकळले

अखेर आपली फसवणूक झाल्याचे लक्षात येताच ललित पोफळे यांनी नाशिक पोलिसांत धाव घेतली. २४ एप्रिल २०२६ रोजी सरकारवाडा पोलिसांनी अशोककुमार खरात विरुद्ध भारतीय न्याय संहिता (BNS) कलम ३०८(२), ३०८(५) आणि ‘महाराष्ट्र नरबळी आणि इतर अमानुष, अनिष्ट व अघोरी प्रथा व जादुटोणा प्रतिबंधक अधिनियम २०१३’ च्या कलम ३(१), ३(२) नुसार गंभीर गुन्हा (FIR No. 12) दाखल केला आहे. या प्रकरणाचा पुढील तपास गुन्हे शाखेच्या वरिष्ठ पोलीस निरीक्षक डॉ. आंचल मुदगल आणि सहाय्यक पोलीस निरीक्षक चेतन श्रीवंत करत आहेत. या अटकेनंतर भोंदू बाबा ‘कॅप्टन’चे आणखी किती काळे कारनामे बाहेर येतात, याकडे संपूर्ण राज्याचे लक्ष लागून आहे!