💥 नाशिकमध्ये ‘डॉन’गिरीची हवा, अवघ्या ४८ तासांत खाकीने काढली! शिर्डीत ‘सिनेस्टाईल’ पाठलाग करत उपनगर पोलिसांची धडक कारवाई; गावठी कट्ट्यासह मुख्य आरोपी गजाआड! 💥

लाल 🚨 दिवा-नाशिक,दि.७:- (खास प्रतिनिधी): “आम्ही इथले डॉन आहोत, कोणाचाही गेम वाजवून टाकू!” अशी वल्गना करत मध्यरात्री गोळीबार करून देवळाली गावात दहशत माजवणाऱ्या स्वयंघोषित ‘डॉन’ची नाशिक पोलिसांनी अवघ्या ४८ तासांत हवा काढली आहे. एखाद्या चित्रपटालाही लाजवेल असा थरारक पाठलाग करत, उपनगर पोलिसांच्या गुन्हे शोध पथकाने शिर्डी परिसरातून मुख्य आरोपी किशोर निकम याला बेड्या ठोकल्या आहेत. त्याच्याकडून ३० हजार रुपये किमतीचा गावठी कट्टा जप्त करण्यात आला असून, नाशिक पोलिसांच्या या ‘सिंघम’ स्टाईल कामगिरीचे सर्वत्र कौतुक होत आहे.

दिनांक ३ जून २०२६ च्या मध्यरात्री १२:३० ची वेळ. देवळाली गावातील एन.एम.सी क्वार्टर परिसरात शांतता असतानाच अचानक गोळीबाराचा आवाज घुमला आणि परिसर हादरला. जुन्या वादातून आरोपी किशोर निकम, राहुल निकम आणि त्यांच्या एका साथीदाराने फिर्यादी रितीक पारचे याच्यावर गावठी कट्ट्यातून थेट गोळीबार केला. सुदैवाने या हल्ल्यात रितीक बचावला. मात्र, आरोपींनी एवढ्यावरच न थांबता “आज हा वाचला, पण इथला डॉन मीच आहे, जो मस्ती करेल त्याला जिवंत सोडणार नाही,” अशी धमकी देत परिसरात दहशत माजवली. या घटनेने नागरिकांमध्ये भीतीचे वातावरण निर्माण झाले होते.

पोलिस आयुक्तांचे कडक आदेश आणि खाकीची ॲक्शन!

घटनेचे गांभीर्य ओळखत पोलिस आयुक्त श्री. संदीप कर्णिक यांनी तत्काळ ‘ॲक्शन मोड’मध्ये येत गुन्हेगारांच्या मुसक्या आवळण्याचे कडक आदेश दिले. पोलिस उपायुक्त श्री. किशोर काळे, एसीपी श्रीमती संगिता निकम यांच्या मार्गदर्शनाखाली वरिष्ठ पोलिस निरीक्षक जयंत शिरसाठ आणि पोलिस निरीक्षक (गुन्हे) संजीव फुलपगारे यांनी तातडीने सूत्रे हलवली. गुन्हे शोध पथकाचे धडाडीचे अधिकारी पोउनि प्रभाकर सोनवणे आणि त्यांच्या टीमने रात्रंदिवस एक करत आरोपींचा माग काढण्यास सुरुवात केली.

शिर्डीत रंगला ‘फिल्मी’ थरार!

तांत्रिक विश्लेषण आणि खबऱ्यांच्या माहितीवरून आरोपी अहिल्यानगर (अहमदनगर) जिल्ह्यात पळून गेल्याचे निष्पन्न झाले. पोलिसांचे पथक त्याच्या मागावर होतेच. ५ जूनच्या मध्यरात्री मुख्य आरोपी किशोर निकम हा शिर्डीजवळील सावळी विहीर परिसरात असल्याची पक्की खबर पोलिसांना मिळाली. खाकी वर्दीची चाहूल लागताच आरोपीने अंधाराचा फायदा घेत पळून जाण्याचा प्रयत्न केला. पण उपनगर पोलिसांच्या चपळ पथकाने जिवाची बाजी लावत त्याचा थरारक पाठलाग केला आणि अत्यंत शिताफीने त्याला झडप घालून पकडले.

अंगझडतीमध्ये त्याच्याकडे ३० हजार रुपये किमतीचा लोखंडी गावठी कट्टा सापडला, जो पोलिसांनी तत्काळ जप्त केला. ‘डॉन’ बनण्याचे स्वप्न पाहणारा गुन्हेगार आता पोलिसांच्या कोठडीत हवा खात आहे.

गुन्हेगारांना त्यांच्याच भाषेत उत्तर देण्याची ही यशस्वी कामगिरी पोलिस आयुक्त श्री. संदीप कर्णिक यांच्या नेतृत्वाखाली, वपोनि जयंत शिरसाठ, पोनि संजीव फुलपगारे, पोउनि प्रभाकर सोनवणे, तसेच पथकातील शिलेदार विनोद लखन, जयंत शिंदे, गौरव गवळी, सुरज गवळी, पंकज कर्पे, संदेश रघतवान, संदीप पवार, सुनील गायकवाड, अनिल शिंदे, प्रशांत देवरे, सतीश मडवई, प्रविण सांगळे आणि मपोहवा गोसावी (तांत्रिक विश्लेषण) यांनी पार पाडली. पोलिसांच्या या धडक कारवाईमुळे गुन्हेगारांचे धाबे दणाणले असून, नाशिककरांनी सुटकेचा निश्वास टाकला आहे.